Улсын хэмжээнд “Насны хишиг” мөнгөн тусламжийг ахмадуудад Улсын баяр наадам болон Сар шинийн баярын өмнө, жилд 2 удаа олгодог. Энэ онд 65 нас хүрч буй, “Насны хишиг” хөтөлбөрт хамрагдах ахмадуудын хүсэлтийг хүлээн авч бүртгэж эхэллээ. Тодруулбал, 1958 оны долоодугаар сарын 16-наас 1959 оны хоёрдугаар сарын 12-ны хооронд төрсөн ахмад настнууд 2024 оны хоёрдугаар сарын 9-нөөс өмнө “Насны хишиг” хөтөлбөрт хамрагдах хүсэлтээ Ehalamj.mn сайтаар болон хорооны Хөдөлмөр эрхлэлт, халамж хариуцсан мэргэжилтэнд хандан гаргах талаар ХНХЯ-наас мэдээллээ.
“Насны хишиг” хөтөлбөрт хамрагдах хүмүүс иргэний үнэмлэхээ авч очихоос гадна өөрийн нэр дээр ашигладаг дансны дугаараа мэдэж байх шаардлагатай.
Бүртгүүлэхэд заавал өөрийн биеэр очих шаардлагагүй бөгөөд итгэмжлэгдсэн төлөөлөгчөөрөө дамжуулж болох аж. Итгэмжлэгдсэн төлөөлөгч нь тухайн хүний иргэний үнэмлэхийг авч очиж “Насны хишиг” авах өргөдлийн маягтыг бөглөж бүртгүүлэх юм. Өмнө нь “Насны хишиг” авч байсан ахмадууд шинээр хүсэлт гаргах шаардлагагүй аж.