“Kpop Demon Hunters” анимейшн үзэгчдийн дунд шуугиан тарьж, дуу хөгжим, дүрслэлийн чанараараа онцгой амжилтад хүрсэн. Гэвч үзэгчдийн хүсэж байсан нэг зүйл “бодит жүжигт хувилбар”. Харамсалтай ойрын хугацаанд энэхүү хувилбар хэрэгжихгүй бололтой.
Киноны зохиолч, хамтран найруулагч Мэгги Канг болон найруулагч Крис Аппелхэнс нар BBC-д өгсөн ярилцлагадаа “одоохондоо бодит жүжигт хувилбар гаргах төлөвлөгөө байхгүй” хэмээн тодорхой хэлжээ.
Кангийн хэлснээр “Киноны өнгө аяс, инээдэм, уур амьсгал нь анимейшнд илүү тохирдог. Эдгээр дүрүүдийг бодит ертөнцөд буулгах нь уран сэтгэмжийн хил хязгаарыг хэт хязгаарлах эрсдэлтэй” гэжээ.
Харин Аппелхэнс “Анимейшны гайхамшиг нь дүрүүдийг хүний чадлаас давсан, уран сэтгэмжийн орон зайд амьдруулахад оршдог. Рүми гэхэд л нэг агшинд хөгжилтэй охин байж чаддаг бол дараагийн мөчид дуулж, тулаанд орж, тэнгэрт хөөрдөг энэ бол анимейшны жинхэнэ баяр баясгалан юм” хэмээн тодотгосон байна.
Тэрбээр мөн “анимейшныг бодит жүжигт хөрвүүлэх оролдлогууд ихэнхдээ хиймэл, бодит бус сэтгэгдэл төрүүлдэг. Тиймээс ‘Kpop Demon Hunters’-ийн ертөнц бодит жүжгээр дамжуулбал өөрийн өвөрмөц чанараа алдах болно” гэжээ.
“Kpop Demon Hunters” нь алдартай охидын хамтлагийн тухай өгүүлдэг бөгөөд тэд зөвхөн K-pop одод биш, харин сүнс сорогч чөтгөрүүдтэй тэмцдэг нууцлаг баатрууд юм. Хамгийн том өрсөлдөгч нь чөтгөрийн дүрд хувирсан хөвгүүдийн хамтлаг.
Энэхүү кино зөвхөн үзвэрийн амжилтаар бус, хөгжмийн чансаагаар ч дээд түвшинд хүрчээ. Billboard-ын мэдээлснээр “Golden”, “Your Idol”, “Soda Pop” зэрэг гурван дуу Hot 100 жагсаалтын эхний 10-т багтсан байна.