Өөр улсын үсрэнгүй хөгжил, соёлын ялгааг хараад эх орноо харьцуулж, доош хийх ер нь дургүй. Манайх хөгжиж яваа улс, удахгүй энэ түвшинд ирнэ дээ л гэж боддог. Гэхдээ хааяа нэг харагддаг даа. Сошиалаар. Улс төртэй холбоо бүхий хүмүүс эмнэлэгт ор хандивлалаа, бэлэглэлээ, гардуулан өглөө гээд. Эмнэлэгийн ор байнга шахуу хүрэлцээгүй, төрөх тасгийн ор нь эрүү шүүлтийн ор шиг байна гэх мэт шүүмжлэл, асуудал ар араасаа салдаггүй нь үнэн юм чинь ор өгөх нь бас нээх буруу зүйл биш ч юм шиг. Гэхдээ манайхныг орны хэрүүл хийж байх зуур урд хөршид хиймэл оюун ухаан гэдэг зүйл гүйцэгдэхгүй шахуу болтлоо бүх салбарт хөгжчихөж. Өмнө нь хоолны салбарт хиймэл оюун ухаанаар робот тогооч хэрхэн ажиллаж байгааг харсан үзсэнээ бичиж байсан даа. Тэгвэл энэ удаа Ai-ийн тусламжтайгаар хэдэн мянган километрийн зайнаас эмч өвчтөндөө хагалгаа хийж, амь насыг нь аварч буйг сонсоод чихэндээ итгэмгүй шахуу л байлаа. Урд хөршийн маань салбар салбарт хийгдэж буй үсрэнгүй хөгжлөөс хураангуйлан танилцуулья.
Жянжяны бичил хагалгааны эмнэлгийн тоног төхөөрөмж
1998 онд Хятадын Шанхай хотын Жянжян шинжлэх ухааны хотод байгуулагдсан бичил хагалгааны эмнэлгийн тоног төхөөрөмж /MicroPort/ нь Хятадын өндөр зэрэглэлийн эмнэлгийн тоног төхөөрөмжийн тэргүүлэх шинэлэг компани юм. Тус компанийн бүтээсэн технологийн тусламжтай зургаан секунд тутамд дэлхийн хаа нэгтээ хүний амь насийг аварч байдаг гэнэ. Өөрсдийн үйлдвэрлэсэн бүтээгдэхүүн, технологийн шийдлээр хүний амьдралын чанарыг уртасгаж, 115 хүртэл наслуулах боломжтой гэдгийг мөн хэлж байв. Микропорт компани нь Шанхай, Сүжөү, Шэньжэнь АНУ-ын Мемфис, Францын Парис, Италийн Милан, Доминаканы Бүгд найрамдах улсад томоохон судалгаа үйлдвэрлэлийн баазуудыг байгуулж, дэлхий дахины судалгаа, хөгжил, үйлдвэрлэл, маркетинг, үйлчилгээний сүлжээг бий болгожээ.
Тус компани нь 30 гаруй орны 12000 гаруй ажилтантайгаас ихэнх хувийг Хятад ажилчид эзэлдэг.
Микропорт компани нь зүрх судас, электрофизиологи, зүрхний, яс болон зөөлөн эдийг нөхөн сэргээх технологи гэх мэт тархи, мэдрэлийн системийн эмгэгийг эмчлэхэд шаардагдах 500 төрлийн бүтээгдэхүүн үйлдвэрлэж, дэлхийн 20000 гаруй эмнэлгийн үйлчилгээнд нэвтрүүлсэн компани юм.
Бидний сайн мэдэхээр “Зүрхний титэм судасны нарийсалтай өвчтөнд суулгадаг стент” –зэрэг олон бүтээгдэхүүн үйлдвэрлэдэг. Тэд тоног төхөөрөмж, бүтээгдэхүүнээ таван жил тутамд сайжруулан загварчилдаг. Мөн хиймэл оюун ухаанд суурилсан робот, тоног төхөөрөмжийн тусламжтайгаар алслагдсан муж, суурингийн эмнэлгүүд дэх өвчтөнд алсын зайнаас нарийн мэргэжлийн яаралтай хагалгааг хийдэг болжээ. Энэ мэтчилэн Хятад улсын салбар салбарын компаниуд хиймэл оюун ухааныг орчин үеийн техник технологитой хослуулж бидний боломжгүй гэж боддог байсан зүйлсийг ч бүтээгээд эхэлчихсэн ажээ.
