БШУЯ-наас “Шинэ сэргэлтийн бодлого-Шинжлэх ухааны оролцоо” үндэсний хэлэлцүүлгийг зохион байгуулсан. Тус хэлэлцүүлгээс Шинэ сэргэлтийн бодлогыг хэрэгжүүлэхэд шинжлэх ухааны салбарын үүрэг оролцоог тодорхой болгон, төр-шинжлэх ухаан-хувийн хэвшил, хөрөнгө оруулагчдын идэвхтэй түншлэлд тулгуурласан гарц шийдлийг тодорхойлон зөвлөмж гарган холбогдох шийдвэрийг засгийн газарт танилцуулахаар тогтсон.
Энэ хүрээнд засгийн газрын ээлжит хуралдаанаар “Шинэ сэргэлтийн бодлого”-ын хүрээнд хэрэгжих эдийн засгийг богино хугацаанд сэргээх тодорхой тооны мега төслүүдийн техник эдийн засгийн үндэслэл, нийгэм эдийн засаг, байгаль орчны нөлөөллийн үнэлгээ тооцоолол судалгааг хийх, технологийн шийдэл боловсруулах, тухайн салбарт шаардлагатай инженер техникийн ажилтан, хүний нөөцийн чадавхийг бэхжүүлэхэд шинжлэх ухааны байгууллага, эрдэмтдийн оролцоог хангах томоохон шийдвэрийг батлууллаа.
Ингэснээр үндэсний түвшинд төрийн бодлого, шийдвэрийг салбар дундын, салбар дамнасан шинжлэх ухааны нотолгоо, баримт, судалгаа тооцоонд үндэслэн хэрэгжүүлэх улмаар төсөл хөтөлбөрийн үр дүн чанартай, хүртээмжтэй байх суурь нөхцөл бүрдэж байна.
Мөн түүнчлэн, шинжлэх ухааны салбарт олон жил яригдсан төрийн болон орон нутгийн өмчийн хөрөнгөөр бараа, ажил үйлчилгээ худалдан авах үйл ажиллагаанд эрдэм шинжилгээний байгууллагыг өрсөлдөөний зарчимд нийцүүлэн оролцуулах эрхийг нээх, шаардлагатай зохицуулалтыг тусгах, Эрдэм шинжилгээний байгууллагын оюуны өмчид үнэлгээ тогтоож, хөрөнгийн барьцаа болгон ашиглах асуудлыг шийдвэрлэх, Байгаль орчинд нөлөөлөх байдлын үнэлгээний тухай хуулийн хэрэгжилтийг хангаж үнэлгээ хийхэд тухайн чиглэлийн мэргэжлийн эрдэм шинжилгээний байгууллага, эрдэмтэн судлаачдаар хийлгэх зэрэг эрх зүйн зохицуулалтыг тус тус бий болгох шийдвэрийг Засгийн газраас гаргалаа.
