Зулай зулайгаа гишгэж төрсөн нэг айлын дөрвөн хүү хамтдаа энэ жилийн насанд хүрэгчдийн Улсын аварга шалгаруулах тэмцээнд тулалдсан нь Монголын боксын түүхэнд анхны тохиолдол болсон. Тэд армийн “Алдар” спорт хороонд данстай, Монгол Улсын гавьяат дасгалжуулагч Аабатын Гантулга, ОУХМ Жигжидийн Отгонбаяр нарын шавь, Хархүүгийн Энх-Амар, Энхмандах, Билгүүнсайхан, Дөлгөөнсайхан нар юм.
Ах дүү дөрөв улсын аваргад 48, 51, 54, 57 кг гэсэн өөр өөр жинд өрсөлдөж том ах ОУХМ Х.Энх-Амар нь 10 дахь удаагаа Монгол Улсын аваргаар тодорч, хоёр дахь ах ОУХМ Х.Энхмандах нь дотооддоо тавдахиа босоо байлаа. Гурав дахь нь спортын мастер Х.Билгүүнсайхан финалд шалгарч мөнгөн медаль зүүв. Хамгийн бага дүү Х.Дөлгөөнсайхан нь томчуудтай анх удаагаа нударга зөрүүлсэн ч медаль хүртэж чадаагүй.
Эх сурвалж – MGL SPORT
