ХАРЦАГА ЦОЛТНЫ БАРИЛДААНД ЗААН Б.БАТ-ӨЛЗИЙ ТҮРҮҮЛЭВ

“Жем Интернэшнл” компанийн нэрэмжит Монгол Улсын харцага цолны хүндэтгэлийн барилдаан өчигдөр Монгол бөхийн өргөөнд боллоо. Улсын арслан Э.Оюунболд, Р.Пүрэвдагва, улсын гарьд М.Бадарч, улсын заан Н.Жаргалбаяр, Б.Батмөнх, Б.Бат-Өлзий, Ц.Одбаяр, М.Лхагвагэрэл, улсын харцага Ш.Уламбаяр, Л.Лха-Очир, Ө.Даваабаатар, Х.Гантулга, Ц.Мөнхбаяр, Г.Бадрах, Ц.Бямба-Отгон тэргүүтэй улс аймгийн алдар цолтой 256 бөх барилдав.
Барилдаанд Ховд аймгийн Зэрэг сумын харьяат улсын заан Баярхүүгийн Бат-Өлзий түрүүлж, Архангай аймгийн Булган сумын харьяат улсын арслан Рэнцэнбямбын Пүрэвдагва үзүүрлэж, их шөвөгт Завхан аймгийн Яруу сумын харьяат улсын заан Мөнхтөрийн Лхагвагэрэл, Төв аймгийн Баянцогт сумын харьяат улсын харцага Өлзийбатын Даваабаатар үлдэв. Дунд шөвөгт улсын арслан Э.Оюунболд, улсын харцага Л.Лха-Очир, Ц.Мөнхбаяр, цэргийн заан Ө.Батсуурь нар шалгарлаа.