Сунаж мөргөх нь хөдөлгөөний дутагдлаас сэргийлэх хамгийн энгийн арга аж. Та шашин шүтдэг ч бай үгүй ч бай сунаж мөргөж байвал,
- Нуруу хөших
- Нурууны булчин татаж, хөдөлж чадахгүй гацах
- Хуян хөөрөх
- Толгой эргэх
- Үе мөч янгинах
- Илүүдэл жинтэй байх зэрэг зовиураас ангид эрүүл саруул, эрч хүчтэй амьдрах таатай нөхцөл бүрддэг байна.
Хамгийн гол нь мөргөл нь ямар ч насны хүн хийж болдог учир давуу талтай юм.
Мөргөл үйлдэх хэмээх зан үйл нь шашны хувьд өөрийн шүтэн биширдэг зүйлдээ хүндэтгэл үзүүлж байгаа төдийгүй шашин бүрийн ойлголтоос хамаараад гүн гүнзгий утга агуулдаг. Та бидний сайн мэдэх дэлхийн томд тооцогдох гурван шашинд бүгдэд нь сунаж мөргөх зан үйл байдаг ажээ.
Монголчууд бидний өвөг дээдсийн шүтэж ирсэн Буддын шашин, европын орнуудын дийлэнх хүн амын шүтдэг Христийн шашин болон ойрхи дорнод, зүүн өмнөд Ази, Араб зэрэг оронд шүтэн хүндэлдэг Лалын шашин бүгд өөр өөрийн арга барилаар мөргөл үйлддэг.
Хамгийн гол нь хүн мөргөл үйлдэж байхдаа юу бодох нь их чухал юм. Хэрэв та шашин шүтдэггүй бол өөрийн биеэ эрүүлжин, цовоо сэргэлэн болж байна хэмээн бодоход л хангалттай. Хөдөлгөөн хийснээр таны биед аз жаргалын даавар ялгаран илүү өөдрөг, гэгээлэг бодолтой, хандлагатай болдог байна.
