Хоолойн ангина буюу гүйлсэн булчирхайн үрэвсэл (хоолойн мах ч гэж ярьдаг) нь цус задлагч А бүлгийн стрептококк нянгаар үүсгэгддэг. Уг халдвар гаднаас болон дотроос үүсгэгдэх боломжтой. Гаднаас халдварлагдах өвчний эх үүсвэр нь өвчтэй хүн юм. Өвчтэй хүн ханиаж найтаахад өвчин үүсгэгч эргэн тойронд цацагдаж халдварын голомтуудыг үүсгэдэг. Тэгэхдээ ахуйн хэргэлээний эд зүйлс болох сав суулга, цагаан хэрэглэл, алчуурт наалдаж нянг хадгалж бас дамжуулна.
Харин үрэвслийн дотоод эх үүсвэр нь цоорсон шүд, өвчтэй буйл, архаг ханиад, гүйлсэн булчирхайн үрэвсэл зэрэг нь архаг халдварын голомтууд болдог. Бага насны хүүхдэд аав, ээж болон гэр бүлийнхнээс ахуйн замаар болон шүлсээр дамжин халдвар дамжина. Тиймээс гэр бүлийн өвчин ч гэж нэрлэдэг.
Уг үрэвсэл н удамшдаг биш халдварладаг учир өвчлөл үүсэх болон сэдрэхэд нөлөөлөх олон хүчин зүйлүүдтэй. Үүнд хэт даарах, хэт халах, агаарын бохирдол, тоосролт, дархлал буурах, гүйлсэн булчирхайн механик гэмтэл зэрэг хамаарна. Мөн архи уух, тамхи их татах нь өвчнийг даамжруулдаг.
