Засгийн газрын хуралдаанаар ХЗДХЯ-наас боловсруулсан Нийтийн албанд нийтийн болон хувийн ашиг сонирхлыг зохицуулах, урьдчилан сэргийлэх тухай хуулийн нэмэлт, өөрчлөлтийн төслийг дэмжиж, УИХ-д өргөн мэдүүлэх зөвшөөрөл олголоо.
Сүүлийн жилүүдэд улстөрчид олноор нэр холбогдсон Хөгжлийн банк, ЖДҮ-ийн зээл, нүүрсний хулгайн хэрэг зэрэг Төрийн болон орон нутгийн өмчит компанийн удирдлагууд, эдгээр компаниудтай холбоотой ашиг сонирхлын зөрчил бүхий үйлдлүүдэд иргэд олон нийт ихээр эгдүүцэж байгаа.
УИХ-ын гишүүн, Монгол Улсын Ерөнхий сайд, Засгийн газрын гишүүн, Аймаг, нийслэлийн Засаг дарга, тэдгээрийн эхнэр, нөхөр, хамтран амьдрагч, хүүхэд гэсэн категориор улс төрд нөлөө бүхий этгээд гэдэг хязгаарыг тодорхойллоо.
Улс төрд нөлөө бүхий этгээд, тэдгээрийн эхнэр, нөхөр, хамтран амьдрагч, хүүхдүүд төрийн албанд удирдах албан тушаал эрхлэх, Төрийн болон орон нутгийн өмчит компаниуд тэдгээрийн оролцоотой компаниудад удирдах болон эрх бүхий албан тушаалд томилогдохыг хориглосон.
Түүнчлэн төрөөс хэрэгжүүлж буй бүх төрлийн төсөл, хөтөлбөр, хөнгөлөлт баталгаа, тусламж, гадаад болон дотоод зээлд хамрагдахгүй байхыг хуульчилна. Энэ дээр хүүхдүүдийнх нь сургалтын төрийн санд хамрагдах эрхийг нь хязгаарлаж байгаа.
Мөн бүх төрлийн төрийн тендер, сонгон шалгаруулалтад хамаарал бүхий ААН-ээрээ оролцохгүй байх зохицуулалтыг тусгасан.
Өөрөөр хэлбэл нээлттэй болон хязгаарлагдмал тендер, төр болон хувийн хэвшлийн тендер сонгон шалгаруулалт, цаашлаад оффтэйк гэрээ болон бусад концессын гэрээний сонгон шалгаруулалтад хамаарал бүхий ААН, хуулийн этгээдээрээ оролцохгүй байх зохицуулалтыг хийсэн.
Гэхдээ бид үүгээрээ хүний аж ахуй эрхлэх эрхийг хязгаарлаж байгаа юм биш. Улс төрд нөлөө бүхий албан тушаал хаших гэж байгаа бол аж ахуйгаа эрхлэх үү, улс төрийн карьераа сонгох уу гэдэг сонголтоо хийх ёстой.
