Шинэ оны анхны долоо хоног. Хүн бүр өнгөрсөн онд амьдарсан өөрийгөө тодорхой хэмжээнд дүгнэж, ирэх онд хэн байх вэ гэдгээ дотроо ямар нэгэн байдлаар төсөөлсөн байх. Хэдий он солигдох мөчид бидэнд хур мэт эрч хүч хуримтлагдаж, ам гарсан болгондоо хүрч чадах юм шиг мэдрэмж төрдгийг нуух юун. Тэгвэл энэ бүхэн хоёрдугаар сараас саармагжиж, эрч нь суларч, амьдрал нөгөө л нэг байдгаараа уйтгартай үргэлжилдэг. Угаас хувь хүн өөрөө нэгдсэн зохион байгуулалтад орж, өөртөө сахилга бат тогтоож гэмээнэ бүхий л цаг үед сэтгэл хангалуун амьдрах учиртай биз. Тиймээс шинэ он гэх малгайн дор хэт их зорилго тавин өөрийгөө ядрааж, түгшээх бус. Тодорхой төлөвлөгөөнд захирагдан бодит бүтээмж, үр дүнд хүрэх энгийн зөвлөгөөг уншигч танд хүргэж байна.
Хатуу тоо заасан зорилго битгий тавиарай
Би заавал 10 килограмм хасна гэж зорилоо гэж бодъё. Шууд тоо заагаад орхичихоор энэ зорилго хэзээ ч биелэлээ олохгүй. Хэдий хугацаанд, ямар аргаар, хэрхэн жингээ хасах тухай өөрийн биедээ таарсан судалгааг хийхгүйгээр хүссэн биеэ урлах боломжгүй. Тиймээс би эрүүл хооллоно. Цагаар хооллоно. Өдөрт хэсэгхэн ч болов алхана. Өөрийгөө шахаад дасгал хийнэ. Усаа хангалттай ууна. Шөнийн нойроо бүтэн авна зэрэг тодорхой зорилтуудыг өмнөө тавиад биелүүлэх гэж хичээгээрэй. Мэдээж энэ бүхний нийлбэр нь таны хүсээд байгаа жин хасах үндсэн алхмууд болох юм. Нэмж хэлэхэд богино хугацаанд хүссэндээ хүрэх гэж адгах нь өөрийгөө хуурч байгаа хэлбэр. Алхам алхмаар гарах үр дүнд сэтгэл ханамжтай байгаарай.
Ирэх долоо хоног, маргааш, нэг дэхээс гэж хойшлуулдаг уу
Магадгүй та бүх зүйлийг дэс дараатай, цэгцтэй эхлүүлдэг нэгэн байж мэднэ. Бэлдээд л, төлөвлөөд л, цаг цагаар нь бичээд л. Болно л доо. Гэхдээ хойшлуулж төлөвлөсөн зүйл үйлдэл болохгүй цаасан дээр үлдэх магадлал өндөр байдаг. Тиймээс ном уншина даа гэж биш. Одоо хоёр хуудсыг ч хамаагүй уншъя. Дасгал хийнэ дээ гэж биш яг одоо интернетээс хайгаад хийж үзье. Арьсаа арчилна даа биш яг одоо гуужуулаад маск тавья. Хэл сурна даа биш яг одоо таван үг цээжилье гэх зэргээр үйлдэл хийгээрэй. Хэрэв та үнэхээр зорилгодоо хүрэхийг хүсч л байгаа бол дадал болтол нь давтахаас өөр сайн жор гэж үгүй.
Ганцаараа байсан ч үйлдэл хийж болдог
Хамт явах хүн байвал фитнесст явмаар байна. Ханиндаа сургалтад суух хүн байна уу. Хэл сурах гэхээр ганцаардаад байна гэх мэт асуудал зарим хүнд тохиолддог. Гэтэл энэ нь сурахгүй, хөгжихгүй урагшлахгүй байх зайлшгүй хүчин зүйл биш. Хэрэв танд тухайн ур чадвар, давуу тал, онцлог хэрэгтэй байгаа бол хэн нэгэнтэй хамт хийнэ гэж хойш тавилгүй өөрөө хийж эхээрэй. Магадгүй та алхам хийснийхээ дараа өөртэйгөө ижил сонирхолтой найзуудтай учирч мэдэх юм.