Гадаадын иргэн, харьяатын газар 2022 оны арваннэгдүгээр сард төлөвлөгөөт хоёр, төлөвлөгөөт бус 34 удаагийн хяналт шалгалт явуулжээ. Улмаар зөрчил гаргасан зургаан улсын 15 гадаадын иргэнд холбогдуулан Зөрчлийн тухай хуулийн дагуу нийт 1,500,000 төгрөгийн торгох шийтгэл оногдуулсан байна. Зөрчил гаргасан иргэдийн дийлэнх хувь нь нутаг дэвсгэрт оршин суух үнэмлэхийг эзэмших, ашиглах, хадгалах журам зөрчжээ. Иймд гадаадын иргэний эрх зүйн байдлын тухай хуулийн хүрээнд гурван улсын 13 иргэнийг албадан гаргасан байна. Тодруулбал, Йордан, Саудын Араб, БНХАУ зэрэг гурван улсын 13 иргэнийг эрх бүхий байгууллагын зөвшөөрөлгүйгээр хөдөлмөр эрхэлсэн, ирсэн зорилгоосоо өөр үйл ажиллагаа явуулсан гэх үндэслэлээр албадан гаргаад буй. Өнгөрсөн оны мөн үетэй харьцуулахад албадан гаргасан гадаадын иргэн 96.8 хувиар өссөн байна.
