Өмнөд Солонгосын Ерөнхийлөгч Ли Жэ Мён мягмар гарагт Үндэсний Ассамблейд хэлсэн төсвийн илтгэлдээ хиймэл оюун ухааны (AI) дэд бүтэц, технологийн хөгжилд чиглэсэн төрийн хөрөнгө оруулалтыг гурав дахин нэмэгдүүлэхийг уриалав.
Мөн тэрбээр 2026 оны улсын төсөвт батлан хамгаалахын зардлыг 8.2 хувиар нэмэгдүүлэх санал дээр хууль тогтоогчдыг дэмжлэг үзүүлэхийг уриаллаа. Энэ нь Өмнөд Солонгосын зэвсэгт хүчнийг шинэчлэх, АНУ-аас хэт хамааралтай байдлыг бууруулах зорилготой гэж Ерөнхийлөгч онцолсон юм. Түүний илтгэлийн үеэр сөрөг хүчний ихэнх гишүүд, хуучин Ерөнхийлөгч Юн Сок Ёлын 12-р сард зарласан богино хугацааны цэргийн хуулийн дэглэмтэй холбоотой мөрдөн шалгах ажиллагааны маргаанаас болж, хэлэлцүүлгийг бойкотлосон байна.
Ли Жэ Мён хэлэхдээ, нийт 728 их наяд вон (ойролцоогоор 506 тэрбум ам.доллар) бүхий ирэх оны төсөв нь улсын түүхэнд “хиймэл оюун ухааны эрин үеийг нээх анхны төсөв” болохыг онцлов.Тэрээр парламентын гишүүдийг AI-тэй холбоотой 10.1 их наяд вон (6.9 тэрбум ам.доллар)-ын зардлыг батлахыг уриалсан бөгөөд энэ нь өнгөрсөн жилийн түвшнээс гурав дахин өндөр үзүүлэлт юм.
Энэхүү хөрөнгө оруулалт нь чип үйлдвэрлэл, автомашин, усан онгоцны үйлдвэрлэл, роботын салбар зэрэг стратегийн үйлдвэрүүдэд AI-ийн хэрэглээг өргөжүүлэх зорилготой гэж Ерөнхийлөгч тодотгожээ. “Ерөнхийлөгч Пак Жон Хи аж үйлдвэрийн хурдны замыг тавьсан, Ерөнхийлөгч Ким Дэ Жүн мэдээллийн эрин үеийн хурдны замыг байгуулсан шиг одоо бид хиймэл оюун ухааны эрин үеийн хурдны замыг тавих ёстой” гэж Ли хэллээ.
