PAHO-ийн мэдээлснээр эмэгтэйчүүдийн эрүүл мэндийн судалгаа түүхэн хугацаанд нөхөн үржихүйн насанд голчлон төвлөрч, цэвэршилтийн үеийн эрүүл мэнд харьцангуй бага анхаарал татаж иржээ.
Гэтэл цэвэршилт нь эмэгтэйчүүдийн амьдралын байгалийн үе шат боловч халуу оргих, нойрны хямрал, сэтгэл санааны өөрчлөлт, шээс бэлгийн замын шинж тэмдгүүд илэрч, амьдралын чанарт нөлөөлөх боломжтой. Мөн энэ үе нь зүрх судасны өвчний эрсдэлийг үнэлэх, ясны сийрэгжилтээс урьдчилан сэргийлэх, эрүүл амьдралын хэв маягийг дэмжих чухал боломж юм.
Эмэгтэйчүүд амьдралынхаа бараг гуравны нэгийг цэвэршилтийн дараах үед өнгөрүүлэх боломжтой тул эрүүл мэндийн тусламжийг зөвхөн шинж тэмдэг намдаахад чиглүүлэх нь хангалтгүй гэж PAHO онцолжээ. Судалгааны хүрээнд 15 удирдамжийг нарийвчлан шинжлэхэд оношилгоо, эмчилгээ, урьдчилан сэргийлэлт болон тусламж үйлчилгээний зохион байгуулалтын зөвлөмжүүд харилцан адилгүй байв. Ялангуяа эрт цэвэршилт болон хорт хавдрын түүхтэй эмэгтэйчүүдэд зориулсан тусгай зөвлөмж дутмаг байжээ.
Түүнчлэн удирдамжтай байх нь дангаараа хангалтгүй бөгөөд эмч, мэргэжилтнүүдийг сургах, эмчилгээний хүртээмжийг нэмэгдүүлэх, шаардлагатай үед нарийн мэргэжлийн эмчид шилжүүлэх тогтолцоог сайжруулах шаардлагатайг байгууллага анхааруулсан байна.
Мөн PAHO цэвэршилтийг зөвхөн эмэгтэйчүүдийн хувийн асуудал гэж үзэх бус эрүүл насжилт, сэтгэцийн болон бэлгийн эрүүл мэнд, архаг өвчнөөс урьдчилан сэргийлэх бодлогын нэг хэсэг болгохыг уриалжээ.
Эх сурвалж: Pan American Health Organization (PAHO), 2026.11.10.
