1962 онд Пенсильвани мужийн Бристол хот дахь сүмд хүчиндүүлж, амь үрэгдсэн 9 настай охин Кэрол Энн Догертийн хэрэг 62 жилийн дараа шийдэгдлээ гэж Бакс тойргийн прокурорын газар мэдэгдлээ.Прокурор Женнифер Шорн хэлэхдээ “Бидний үзэж байгаагаар энэ нь АНУ-д сүмийн дотор бага насны охинийг хүчиндэж, алсан цорын ганц хэрэг байж магадгүй,” гэж мэдэгдэв.
Хэргийг тангарагтны шүүхийн (grand jury) мөрдөн шалгалтаар дахин сөхөж, Вильям Шрейдер хэмээх эрийг гэм буруутайд тооцон алуурчныг эцэслэн тогтоосон байна. Шрейдер 2002 онд нас барсан ч түүнийг хохирогчийн үхэлтэй “хэдэн арван жилийн турш хадгалагдсан нотлох баримт болон орчин үеийн шинжилгээний дүгнэлтийн хослол”-оор холбож тогтоожээ.
1962 оны аравдугаар сарын 22-нд Кэрол Энн номын санд явах замдаа St. Mark’s Ромын католик сүмийн дотор хүчиндүүлж, боомилогдон амиа алджээ.
Хэрэг гарсны дараа гэрч Шрейдерийг, тухайн үед сүмийн ойролцоо амьдардаг байсан түүнийг, хэргийн орчимд харсан гэж мэдүүлсэн байна. Цагдаа нар түүнийг байцаахад худал мэдүүлэг өгсөн, полиграф (үнэн худлыг шалгах) тестэд бүдэрсэн ч хангалттай нотлох баримт дутмаг байжээ.
Удалгүй Шрейдер Пенсильвани мужийг орхин өмнөд бүс рүү нүүж, олон жил нуугдсан байна. Прокурорын газраас түүнийг “бэлгийн гэмт хэрэг, хүчирхийлэлд давтагдан холбогддог, жинхэнэ махчин этгээд байсан” гэж тодорхойлжээ.
Хэргийг мөрдөн шалгах ажиллагаа 60 гаруй жил үргэлжилсэн бөгөөд мөрдөн байцаалтын явцад 141 хүний бэлгийн үсийг шинжилсэн байна. Шрейдерээс авсан дээж 1990-ээд онд дахин шинжилж үзэхэд охины гарнаас олдсон үсэнд “маш төстэй” болох нь тогтоогджээ. Бусад бүх хүмүүсийн дээж үүнтэй үл нийцсэн тул Шрейдер үлдсэн цорын ганц сэжигтэн болжээ.
Хэрэгт шинэ эргэлт 2024 онд гарчээ. Мөрдөгчид Шрейдерийн өнгөрсөн гэрлэлтээс төрсөн хүүтэй ярилцахад, тэрбээр эцэг нь хоёр удаа “Пенсильвани дахь сүмд нэг бяцхан охиныг хөнөөсөн” гэж хүлээн зөвшөөрч байсан гэж мэдүүлсэн байна. Шрейдер хүүдээ “охиныг сүм рүү хуурч оруулан, хүчиндэж, амьд үлдээвэл цааш ярихаас айсан учраас алсан” гэж хэлжээ.
Хохирогчийн эгч Кэй Догерти хэвлэлийн бага хурал дээр нулимстайгаар “Кэролын үхэл манай гэр бүлийн амьдралыг үүрд өөрчилсөн. Ээж, аав минь хэн охиныг минь алсныг мэдэлгүй хорвоог орхисон. Энэ олон жилийн турш тодорхойгүй байдал бидний амьдралын нэг хэсэг болсон,” гэжээ. “Эцэст нь үнэн тодорч, бидний олон жилийн шарх бага ч болов эдгэрэх боломжтой боллоо.”
Эх сурвалж: ABC news