Франц, Саудын Арабын талууд Парисын ойролцоо “Dragon Ball Z”-ийн ертөнцөөс сэдэвлэсэн парк байгуулахаар тохиролцжээ.
Тодруулбал, Парис хотоос баруун хойд зүгт 30 орчим километрийн зайд орших Сержи-Понтуаз орчимд гурван том сэдэвчилсэн парк байгуулахаар төлөвлөсний нэг нь “Dragon Ball Z”-д зориулагдах юм.
Зургаан тэрбум евро буюу долоон тэрбум орчим ам.долларын хөрөнгө оруулалттай уг төслийг Саудын Арабын Qiddiya хөрөнгө оруулалтын групп санхүүжүүлэхээр болжээ. Гурван парк ашиглалтад орсноор 22 мянга орчим ажлын байр шинээр бий болно гэж тооцоолж байна.
Францын Ерөнхийлөгч Эммануэль Макрон уг төслийг “Disneyland Paris-аас хойш Францад хэрэгжээгүй хэмжээний бүтээн байгуулалт” хэмээн онцолж, дэлхийн хэмжээний аялал жуулчлалын шинэ бүс болно гэж мэдэгдэв.
Харин “Dragon Ball Z” паркт ямар тоглоом, үзвэр байгуулах, барилгын ажлыг хэзээ эхлүүлэх болон хэдийд нээхийг одоогоор зарлаагүй байна. Төслийг бүрэн хэрэгжүүлэхэд хэдэн жил шаардагдах төлөвтэй байгаа аж.
Саудын Арабт мөн “Dragon Ball”-ийн сэдэвт парк барьж байгаа бөгөөд долоон бүс, 30 гаруй тоглоом, 70 метр өндөр галзуу хулгана, зочид буудал, ресторантай байхаар төлөвлөжээ. Гэхдээ Францад байгуулах парк үүнтэй ижил загвартай байх эсэх нь одоогоор тодорхойгүй байна.
