За би бээр өөрөө эм хүйсэнд төрсөн учир өөрийн хүйсний хүрээнд энэ сэдвийг бичиж байгаа гэдгийг уншигч та анхаараарай. Ямар нэгэн жендерийн ялгаварлал гаргаагүй болно.
Бүсгүйчүүд яагаад нүцгэн зургаа сошиалд хийчхээд хүмүүст нэг бол магтуулж, өөлүүлж, хааяа бүр доромжлуулж суудаг юм бол. Ингэж асуух нь байтугай энэ сэдвийг ингэж онцлон бичих нь өөрөө тэнэглэл ч юм шиг. Гэхдээ хүн бүрийн анхаарлын төв, амны зугаа, шүүмж болохдоо амархан сэдэв. Тиймдээ ч сайн муу аль алинаар нь их хэлэгдэнэ.
Угтаа бол хүн хагас нүцгэн, бүрэн нүцгэлсэн зургаа авч тэрийгээ сошиалд эсвэл өөртөө хадгалж үлдэх нь тухайн хүний л сонирхлын асуудал. Гэвч ингэж амраар бодог маш цөөхөн хүмүүс бий.
Нүцгэн зураг тойрсон хүмүүсийн гаргадаг топ маргаанууд
Нэг дэх маргаан сэдэв: “Сошиал орчинд лайк нь багасах, эсвэл дагагч нэмэх гэж нүцгэн зураг хийдэг”
Яг үнэндээ тухайн хүний амнаас нь “ Өө би лайк, дагагчийн тоогоо нэмэх гэж нүцгэн зургаа орууллаа” гэдэг үг хэний ч амнаас сонсож байгаагүй билээ. Та сонсож байсан уу, үгүй гэдэгт чинь би ер нь итгэлтэй байна. Би ч урьд хожид сонсож байгаагүй.
Хоёр дахь маргаан сэдэв: “Эр хүйстний анхаарлыг өөртөө татах урхи”
Эр эм хоёр биедээ татагдахаа хүрвэл шалдан хөх бөгс харсан хараагүй ганцхан ямар гоё хоолой, яриатай бүсгүй вэ гэсэн бодлын эхлэлээс л нэгэндээ татагдчихсан суудаг. Таалагдахгүйгээ хүрвэл хамгийн хүсэмжит биетэй шалдан суугаад ч татагдахгүй. Харин нөгөө утгаараа хоёр биеэ ашиглах гээд эсвэл буруу санаатай бол таарсан хоёр нэгнээ олж, нэгнийхээ үйлийн үр болох учиртай байж л дээ гэж би бээр боддог.
Гурав дахь маргаан: Залуу нас, гоо сайхан биеэ гоё дээр нь хадгалж авах, цаагуураа бусдад гайхуулах нууцхан хүсэл.
Ер нь таны хамгийн энгийн гэж боддог хүн ч дотроо бяцхан эготой байдаг гэхэд нэг их хилсдүүлсэн болохгүй болов уу. Тиймдээ ч бүсгүй хүн бүрд өөрийн залуу насны билэг тэмдэг болсон биеэ яг байгаагаар нь зургийн хальсанд мөнхөлж авах хүсэл нуугдаж байдаг. Авуулсан хойноо бусдад харуулмаар гайхуулмаар хүсэл дотор нь оволзож, нэг бол зөрчилдөнө. Ер нь заавал модель, мисс лаг хүүхнүүд зургаараа гангарч байх ёстой гэсэн зүйл үгүй шүү дээ. Далайн эрэг дээр, гол дээр хардаг усны хувцастай зүгээр хардаг хүүхнээ сошиал дээр харахаар л эвэртэй туулай үзсэн мэт шүүмжлэх доромжлох нь тун сонин.
Нүцгэн үнэн гэдэг шиг нүцгэн зургаас ичиж, цэрвэж нүгэл үзсэн мэт хүлээж аваад яахав дээ. Гоо сайханг хүндэлж, байгаагаар нь харж доромжлохгүйгээр шүүж суръя.