Америкийн дуучин, хөгжимчин, контент бүтээгч Oliver Tree Бразил улсын Рио-де-Жанейро хотод болсон нисдэг тэрэгний мөргөлдөөний үеэр амиа алджээ. Тодруулбал, 2026 оны зургаадугаар сарын 14-ний өглөө Рио-де-Жанейро хотын Recreio dos Bandeirantes дүүрэгт хоёр нисдэг тэрэг агаарт мөргөлджээ. Мөргөлдөөний дараа нэг нисдэг тэрэг нь автомашины худалдааны төвийн талбай дээр унаж, зогсоолд байсан цахилгаан автомашинууд шатсан байна. Харин нөгөө нисдэг тэрэг ойролцоох газарт осолдсон бөгөөд нийт зургаан хүн амиа алдсан гэж гал түймрийн алба мэдээлжээ. Одоогоор албаныхан ослын шалтгааныг хараахан тогтоогоогүй бөгөөд мөрдөн шалгах ажиллагаа үргэлжилж байна.
Олон улсын агентлагуудын мэдээлснээр Oliver Tree-ийн нэр зорчигчдын жагсаалтад байсан бөгөөд Бразилийн цагдаа нар түүнийг ослын хохирогчдын нэг гэж үзэж байгаа талаар мэдээлсэн. Гэхдээ ослын улмаас цогцсууд их хэмжээгээр түлэгдсэн тул зарим хэвлэл мэдээллийн хэрэгслүүдийн мэдээлж байгаагаар шүүх эмнэлгийн албан ёсны таних ажиллагаа үргэлжилж байгаа аж.
