Дуучин, дуу зохиогч EJAE Netflix-ийн KPop Demon Hunters анимэйшн киноны гол дуу болох Golden бүтээлийг хамтран зохиож, дуулснаараа олонд танигдсан уран бүтээлч Мексикт болох 2026 оны хөлбөмбөгийн дэлхийн аварга шалгаруулах тэмцээний нээлтийн ёслолын тайзнаа гарахаар болжээ.
FIFA-аас мэдээлснээр тэрээр Мехико хотын Estadio Azteca цэнгэлдэх хүрээлэнд болох тэмцээний нээлтийн тоглолт болох Мексик–Өмнөд Африкийн тоглолтын өмнөх тусгай шоу хөтөлбөрт оролцох оддын бүрэлдэхүүнд багтсан байна.
Мөн EJAE нь David Guetta, Megan Thee Stallion нартай хамтран ДАШТ-д зориулан бүтээсэн шинэ дуу болох “DNA”-г анх удаа амьд тоглолтоор хүргэхээр төлөвлөж байгаа талаар мэдээлжээ.
Энэ нь EJAE-ийн карьерын хамгийн том олон улсын тайзнуудын нэг болох бөгөөд түүний нэр хүнд K-pop болон дэлхийн поп хөгжмийн зах зээлд улам өсөж байгааг харуулж байна.
FIFA-д өгсөн ярилцлагадаа EJAE:
“Хөлбөмбөгийн дэлхийн аварга шалгаруулах тэмцээний албан ёсны сүлд дуунд оролцоно гэдэг миний хувьд асар их утга учиртай зүйл. Ялангуяа энэ дуунд солонгос хэлээрх үгийг өөрөө бичиж оруулсан нь бүр ч онцгой санагдаж байна. Энэ том тайзан дээр эх орноо төлөөлнө гэдэг үнэхээр нэр төрийн хэрэг” хэмээн хэлжээ.
Тэрээр мөн:
“Миний хүүхэд насны хамгийн сайхан дурсамжуудын нэг бол 2002 оны ДАШТ-ий үеэр Seoul хотод байсан явдал. Тэр үед бүх хот нэгэн зорилгын төлөө нэгдэж байгааг харсан. Гудамжинд огт танихгүй хүмүүс бие биенээ тэвэрч, хамтдаа баярлаж байсан тэр мөчийг би хэзээ ч мартдаггүй. Миний хувьд ДАШТ гэдэг нь яг тэр эв нэгдэл, хамтын баяр баясгалангийн мэдрэмжийг илэрхийлдэг. Тиймээс энэ жилийн тэмцээний нэг хэсэг болж байгаадаа үнэхээр талархаж байна” гэжээ.
