Сүүлийн жилүүдэд гэр бүлийн үүрэг хариуцлагыг тэгш хуваарилах тухай ойлголт дэлхий дахинд төдийгүй манай улсад ч яригдах болсон. Үүнийг шинжлэх ухаан ч баталж байна. Олон улсын болон дотоодын судалгаануудын үр дүнгээс харахад гэрийн ажилд идэвхтэй оролцдог эрчүүд илүү урт насалж, гэр бүлийн амьдралдаа илүү аз жаргалтай байдаг нь тогтоогджээ. Одоо тэгвэл яагаад гэдгийг задлан тайлбарлая.
Эрүүл мэндэд эергээр нөлөөлдөг
Гэрийн ажил тэр дундаа цэвэрлэгээ хийх, хоол хийх, хүүхэд асрах зэрэг нь хүнийг идэвхтэй хөдөлгөөнтэй байлгадаг. Энэ нь зүрх судасны өвчнөөс сэргийлэх, стресс бууруулах, биеийн жинг зохистой түвшинд барих зэрэг олон ач холбогдолтой. Судалгаагаар, гэрийн ажил хийдэг эрчүүдийн дундаж наслалт бусдаас 4-7 жилээр урт байх магадлалтай гэдгийг нотолсон байна.
Хонконгод 4,000 гаруй өндөр настны дунд явуулсан судалгаагаар, гэрийн ажил хийх нь эрүүл мэнд, сэтгэл санааны байдал, биеийн байдлыг сайжруулж, үүний үр дүнд нас баралтын эрсдэлийг бууруулдаг болохыг тогтоожээ. Энэхүү судалгаанд эрчүүдийн хувьд гэрийн ажил хийх нь нас баралтын эрсдэлийг 13% хүртэл бууруулдаг гэж дүгнэсэн байна.
Гэр бүлийн уур амьсгал сайжирдаг
Эрчүүд гэрийн ажилд оролцсоноор эхнэр, хамтрагчийн ачааллыг хуваалцаж, харилцаанд ойлголцол, харилцан хүндлэл бий болдог. Үүний үр дүнд гэр бүлийн гишүүдийн хоорондох сэтгэл ханамж, дотно байдал нэмэгдэж, үл ойлголцлоос үүдэлтэй стресс багасдаг байна.
Хүүхдийн хувьд ч аав нь идэвхтэй оролцоотой байх нь эерэг нөлөөтэй бөгөөд аавын халамж, анхаарал хүүхдийн сэтгэл зүй, өөртөө итгэх итгэл, сургалтын амжилтад сайнаар нөлөөлдөг болохыг сэтгэл судлаачид онцолдог.Аз жаргалын түлхүүр = Хамтын оролцоо
Харвардын их сургуулийн судлаачдын хэлснээр, хамтдаа амьдрал зохиож буй хосуудын харилцаа тэнцвэртэй, ойлголцолтой байх нь урт хугацааны аз жаргалын суурь гэж үздэг. “Хэн нь их ажил хийдэг вэ?” гэх мэт өрсөлдөөн биш, “Яаж хамтдаа оролцох вэ?” гэдэг сэтгэлгээ амьдралыг илүү утга учиртай болгодог аж.
Манай улсад уламжлалт хүйсийн үүрэг харьцангуй гүн шингэсэн байдаг ч сүүлийн жилүүдэд энэ ойлголт өөрчлөгдөж, залуу гэр бүлүүд хамтын амьдралын үнэ цэнийг ойлгож, эрчүүд ч ахуйн ажилд илүү оролцох хандлагатай болж буй нь сайшаалтай. Угаас гэрийн ажил зөвхөн эмэгтэйчүүдийнх биш шүү дээ. Тиймээс тогтвортой, аз жаргалтай гэр бүлийг хүсдэг эр хүн бүр гэрийн ажилд оролцох нь өөртөө болон хайртай хүмүүстээ зориулж буй хамгийн энгийн, хамгийн чухал алхам юм.