Өдөрт ердөө таван минутын дасгал хөдөлгөөн хийх нь сая сая хүний насыг уртасгахад тусалж болзошгүйг шинэ судалгаа харуулжээ.
Бидний өдөр тутмын амьдралдаа хийдэг багахан хэмжээний хөдөлгөөн ч урт хугацаанд эрүүл мэндэд томоохон нөлөө үзүүлдэг байна. Өглөө бүр гүйхээр гарах амаргүй ч дасгал хөдөлгөөн нь зөвхөн бие махбод төдийгүй тархи, ой санамж, сэтгэл зүйд хүртэл эерэг нөлөөтэйг судлаачид онцолдог.
Хамгийн сонирхолтой нь эрүүл байхын тулд заавал өндөр ачаалалтай бэлтгэл хийх шаардлагагүй аж. Судалгаагаар өдөрт ердөө тавхан минут идэвхтэй хөдөлгөөн хийхэд л эрт нас барах эрсдэлийг 10 орчим хувиар бууруулах боломжтой гэж үзжээ. Үүнд хурдан алхах, дугуй унах, шатаар өгсөх зэрэг энгийн хөдөлгөөнүүд багтана.
Энэ нь “өдөрт тавхан минут хөдөлбөл хангалттай” гэсэн үг биш ч огт хөдөлгөөнгүй байснаас хавьгүй дээр гэдгийг харуулж байгаа юм.
АНУ-ын Род-Айлендын их сургуулийн кинезиологийн туслах профессор Николь Логан “Биеийн идэвхтэй байдал нь стресс, ажлын архаг стрессээс сэргийлэхэд маш тустай. Булчингийн хүч, ясны чанар, биеийн ерөнхий чадавх нь урт наслах чухал үзүүлэлт болдог” гэжээ.
Судалгаанд Их Британи, АНУ болон Скандинавын орнуудын 150 мянган насанд хүрэгчийн мэдээллийг ашигласан байна. Судалгааг удирдсан Норвегийн профессор Ульф Экелунд “Өдөрт ердөө тавхан минутын нэмэлт хөдөлгөөн ийм том өөрчлөлт үзүүлнэ гэж төсөөлөөгүй” хэмээн онцолжээ.
Мөн өдөрт суух хугацаагаа 30 минутаар багасгах нь эрт нас барах эрсдэлийг 7 хувиар бууруулдаг болохыг тогтоосон байна. Учир нь хөдөлгөөний дутагдал нь архаг өвчин болон нас баралтын томоохон шалтгаануудын нэг юм.
Судлаачид хамгийн чухал зүйл нь тогтмол байдал гэж зөвлөж байна. Өөрт тохирсон, хийхэд амар хөдөлгөөнөөс эхэлж аажмаар нэмэгдүүлэх нь үр дүнтэй аж.
Сүүлийн жилүүдэд “exercise snacking” буюу өдрийн турш богино хугацааны хөдөлгөөн хийх арга түгээмэл болж байна. Үүнд бүжиглэх, тоос соруулах, шатаар хурдан өгсөж уруудах зэрэг өдөр тутмын жижиг хөдөлгөөнүүд багтдаг бөгөөд эдгээр нь зүрх судас, булчингийн үйл ажиллагаанд эерэг нөлөөтэйг судалгаанууд харуулжээ.
Мэргэжилтнүүдийн үзэж буйгаар дасгал хөдөлгөөн хийх хамгийн үр дүнтэй арга нь заавал фитнесст олон цагаар хичээллэх бус, харин өдөр тутмын амьдралдаа хөдөлгөөнийг тогтмол дадуулах явдал юм.
ЭХ СУРВАЛЖ: BBC
