“Ухаалаг нүдний шил”-ийн хэрэглээ дэлхий даяар эрчимтэй өсөж байгаа ч үүнтэй зэрэгцэн хувийн нууцтай холбоотой маргаан улам нэмэгдэж байна. Ялангуяа Meta компанийн Ray-Ban ухаалаг нүдний шил хамгийн их анхаарал татаж байгаа бөгөөд зах зээл дээрх AI нүдний шилний борлуулалтын 80 гаруй хувийг эзэлж байгаа талаар мэдээлжээ.
Ray-Ban загварын энэхүү төхөөрөмж нь хүрээн дотроо бараг анзаарагдамгүй жижиг камер, чанга яригч болон мэдээлэл харуулах боломжтой линзтэй байдаг байна. Хэрэглэгчид хүрээг нь зөөлөн дарахад л зураг, дүрс бичлэг хийж болдог аж. Гэвч энэ камер маш жижиг тул олон хүн өөрсдийг нь бичлэг хийж байгааг анзаардаггүй байна.
Сүүлийн үед олон нийтийн сүлжээнд эмэгтэйчүүдийг зөвшөөрөлгүйгээр нууцаар бичиж, дараа нь цахим орчинд нийтэлсэн бичлэгүүд олноор тархаж эхэлжээ. Зарим эмэгтэй бичлэгээ устгуулах хүсэлт тавихад “энэ бол төлбөртэй үйлчилгээ” гэсэн хариу хүртэл авч байсан талаар BBC мэдээлсэн байна.
Мөн Meta компанийн AI сургалтын өгөгдөл боловсруулах ажилтнууд ухаалаг нүдний шилээр хийгдсэн бичлэгүүд дунд бэлгийн харилцаа, ариун цэврийн өрөөний хэрэглээ зэрэг маш хувийн агуулгатай бичлэгүүд байсан талаар мэдүүлсний дараа компанийн эсрэг шүүхийн хоёр нэхэмжлэл гарчээ.
Meta компани хэрэглэгчдэд үйлчилгээний нөхцөлөөр тодорхой мэдээлдэг гэж тайлбарласан ч шүүмжлэл үргэлжилсээр байгаа аж. Гэсэн ч борлуулалт буураагүй бөгөөд одоогийн байдлаар дэлхий даяар долоон сая гаруй ухаалаг нүдний шил худалдаалагдсан байна.
Түүнчлэн Apple, Google, Snap зэрэг компаниуд өөрсдийн AI болон AR технологитой ухаалаг нүдний шил хөгжүүлж байгаа талаарх мэдээлэл бий.
Гэхдээ хэрэглэгчид зөвхөн сөрөг тал ярьж байгаа биш юм. Зарим нь хөгжим сонсох, утсаар ярих, аяллын үеэр гар утас гаргахгүйгээр зураг авах зэрэгт маш тохиромжтой гэж үзэж буй.
Харин мэргэжилтнүүдийн анхааруулж буйгаар ухаалаг нүдний шил түгээмэл болох тусам олон нийтийн газар нууцаар бичлэг хийх, хувийн нууц алдагдах, хүмүүс өөрсдийгөө байнга хяналтад байгаа мэт мэдрэх эрсдэл нэмэгдэх магадлалтай аж.
ЭХ СУРВАЛЖ: BBC
