Шинэ засгийн газар танилцуулах чуулганы хуралдаанаар /2026.04.03/
УИХ-ын гишүүд Ерөнхий сайд болон Засгийн газрын гишүүдэд тавьсан асуулт болон хэлсэн үгийг хүргэж байна.
Тийм ээ. Би эрүүл мэндийн мэргэжилтэй биш, эмч биш ээ. Гэхдээ эрүүл мэндийн салбарыг цогцоор нь харна. Санхүүжилтийг нь харна. Гадаад харилцааг нь харна. Яаж олон улсын даатгалын системийг Монголд авчрах уу гэж харна. Эрүүл мэндийн даатгал өөрөө хүнд нөхцөлд байгаа. Энийг яаж ижил, хүртээмжтэй болгох уу гэж харна. Эмнэлэгт оочирлоод, ор олдохгүй коридорт хэвтдэг биш. Харин Монгол Улс бол 10 мянган хүнд оногддог орны тоогоороо эхний 10-т ордог. Яаж үүнийг зөв удирдах вэ. Яаж хүртээмжтэй болгох вэ гэдгийг харна. Эрүүл мэндийн салбарт зарцуулах нэг төгрөг болгон Монгол хүний төлөө зарцуулагдахын төлөө ажиллана аа.
Монгол Улсад тодорхой эмүүд байхгүй, чанар нь муу байна. Дээрээс нь манай улсын иргэд өнгөрсөн 2025 онд л гэхэд 120 сая доллараар гадагшаа явж эмчилгээ хийлгэжээ. Энэ төлбөрийн тэнцэл ханшин дээр сөрөг нөлөө авчирч байгаа юм. Үүн дээр дэлхийн чанартай эмнэлгийг авчирах зорилго тавьж ажиллана. Дан урьж авчрах биш, яаж олон улсын эрүүл мэндийн даатгалын компанийг монголын даатгалын компанитай нийлүүлж нутагшуулах вэ гэдэг дээр анхаарч ажиллана. Эрүүл мэндийн даатгал дампуурсан. Мөн хувийн болон бусад эмнэлэг мөнгө аваад байдаг хэрнээ үйлчилгээний чанар муутай. Өвчтөнүүд хангалттай үйлчилгээ авч, үзүүлж чадахгүй байна гэдэг асуудал ярилаа. Үүн дээр системийн анализ хийнэ. Хаана нь болохгүй байгааг харж байгаад, засахын төлөө ажиллана. Миний хувьд биечлэн мэргэжлийн хүмүүстэй хамтарч суугаад эрүүл мэндийн даатгалын сангийн бүх мэдээллийг авч байгаад аудит хийнэ. Юуны тулд санхүүч билээ. Салбарын хувьд хамгийн чадварлаг, туршлагатай хүмүүстэй хамтарч ажиллана. Мөн эмч гишүүдтэйгээ бодлого тодорхойлохдоо хамтарч ажиллана гэдгээ хэлье ээ.
Төрийн ордон, Баасан гараг, 2026.04.03
HUMANZ РЕДАКЦ
ШИНЭ ҮЕИЙН МЭРГЭН УХААН
