УИХ-ын гишүүн, Боловсролын сайд П.Наранбаяр болон УИХ-ын гишүүн П.Ганзориг нар Хөвсгөл аймагт ажиллаж байна. Баасан гарагийн өглөө аймгийн Засаг дарга Л.Төмөрбаатартай уулзаж, цаг үеийн асуудлаар мэдээлэл солилцов.
Энэ үеэр аймгийн Засаг дарга Л.Төмөрбаатар “Оны эхэнд Ерөнхий сайдтай хамт ирэхдээ яригдсан асуудлуудыг шуурхай шийдэхээр эргэн ирж байгаад талархаж байна. Хөвсгөл аймаг бол хамгийн орлого багатай, татаас ихтэй аймаг. Тэр дундаа Дархадын сумд маш хүнд нөхцөлд байгаа. Тухайлбал, Цагааннуур сумын Соёлын төвийн барилга гэхэд сийгсэн байдалтай, сургуулийн хана нь цуурсан байдалтай байна. Тендер зарлахаар оролцох аж ахуйн нэгж олддоггүй” хэмээн нөхцөл байдлыг танилцууллаа.
Боловсролын сайд П.Наранбаяр “Улсын хэмжээнд галлагаатай сургуулийн байр хоёрхон байгаа нь Хөвсгөл аймагт байна. Рэнчинлхүмбэ сумын сургууль барих санхүүжилтийг төсвөөс бүрэн авсан ч барилгын ажлыг дуусгаагүй компанийг хянан шалгаж байна. Гэсэн хэдий ч хүүхдүүд эрүүл, аюулгүй нөхцөлд суралцах ёстой учраас сургуулийн барилгыг дуусгахад шаардлагатай хөрөнгийг АХБ-ны санхүүжилтээр шийднэ. Мөн Цагааннуур сумын тухайд 320 хүүхдийн суудалтай сургуулийн барилгын ажлыг энэ онд эхлүүлнэ” гэлээ.
УИХ-ын гишүүн П.Ганзориг “2026 оныг “Боловсролыг дэмжих жил” болгон зарласантай холбогдуулан төсвийн хэлэлцүүлгийн үеэр Хөвсгөл аймгийн сургуулиудыг шаардлагатай тоног төхөөрөмжөөр хангахад онцгой анхаарч ажиллалаа” хэмээв.
Тус аймагт 2026 онд улсын төсвийн хөрөнгө оруулалтаар 5440 суудалтай 10 сургууль, 800 ортой зургаан цэцэрлэг, 840 ор бүхий таван дотуур байр, нэг спорт заал, нэг МБТБ-ын барилга гээд нийт 179.9 тэрбум төгрөгийн төсөвт өртөгтэй 23 барилга байгууламж баригдаж буй. Үүнээс 2026 онд санхүүжих дүн нь 39,6 тэрбум төгрөг. Мөн АХБ-ны тусламжаар хоёр төсөл хэрэгжиж байгаа юм.
