Соёл, спорт, аялал жуулчлал, залуучуудын яамнаас залуучуудын хөгжил, оролцоо, хамгааллын чиглэлээр үйл ажиллагаа явуулдаг олон улсын байгууллага, иргэний нийгмийн байгууллагуудтай хамтран залуучуудад тулгамдаж буй асуудлуудыг өөрсдийнх нь оролцоотойгоор тодорхойлон эрэмбэлж, шийдвэрлэх үйл ажиллагаанд салбар дундын уялдаа холбоог сайжруулан хамтран ажиллах зорилгоор “ЗАЛУУЧУУДЫН ХӨГЖЛИЙН ТӨЛӨӨХ ТҮНШЛЭЛ: САЛБАР ДУНДЫН УЯЛДАА ХОЛБОО ҮНДЭСНИЙ ЧУУЛГАН”-ыг 2025 оны 10 дугаар сарын 20-ны өдөр Төрийн ордны Их танхимд зохион байгуулна.
- Бүртгүүлэх холбоос: https://forms.gle/4Dqe2W6A32jSqzrX6
Чуулганыг зохион байгуулах ажлын хүрээнд 2025 оны 9, 10 дугаар сард урьдчилсан хэлэлцүүлгүүдийг Архангай, Дорноговь, Ховд, Баян-Өлгий аймгууд болон төрийн захиргааны төв байгууллага тус бүрд зохион байгуулж, тухайн салбар дахь залуучуудын нөхцөл байдал, тулгамдаж буй асуудал, шийдвэрлэх арга зам, салбарын яамнаас хэрэгжүүлж буй бодлого, шийдвэр, үйл ажиллагааны хүрээнд хэлэлцэв.
Хэлэлцүүлгийн үр дүнд гарсан санал, дүгнэлтүүдийг нэгтгэн үндэсний чуулганаар танилцуулж “Залуучуудын хөгжлийг дэмжих тухай хуулийн шинэчилсэн найруулга” болон “Залуучуудын хөгжлийг дэмжих стратеги” зэрэг бодлогын баримт бичигт тусгахын зэрэгцээ нэн чухал, яаралтай хэрэгжүүлэх боломжтой бодлогын шийдвэрүүдээ Засгийн газарт өргөн барьж, хэрэгжилтийг хангахад хамтран ажиллах юм.
Монгол Улсын нийт хүн амын 28 хувь /968,524/-ийг 15-34 насны өсвөр үе, залуучууд эзэлдэг. Энэхүү чуулган нь төр, хувийн хэвшил, иргэний нийгэм, залуучуудын хамтын ажиллагааг өргөжүүлж, залуучуудын хөгжлийг дэмжих шинэ бодлогын шийдвэрүүдийг гаргахад чухал ач холбогдолтой юм.
