20 настай Alysa Liu Милан–Кортина 2026 Өвлийн Олимпын наадамд уран гулгалтын эмэгтэйчүүдийн ганцаарчилсан төрөлд алтан медаль хүртсэн билээ. Энэ нь АНУ-ын баг эмэгтэй уран гулгалтын төрлөөс 24 жилийн дараа анх удаа Олимпын аваргатай болсон түүхэн мөч байсан юм. Түүний мөсөн дээрх үзүүлбэрүүд, ялалтын сэтгэл хөдөлгөм агшнууд сошиал сүлжээгээр богино хугацаанд тархаж, дэлхий даяар олон шинэ дэмжигчийг татсан.
Тэгвэл Олимп эхлэхээс гуравхан долоо хоногийн өмнө Alysa Liu-ийн Instagram хаяг ойролцоогоор 211 мянган дагагчтай байсан бол өнөөдрийн байдлаар 5 саяд хүрчээ. Түүгээр ч зогсохгүй түүний тайван, өөртөө итгэлтэй тоглолт, нарийн техник, уран илэрхийлэмж нь үзэгчдийг байлдан дагуулж, наадмын үеэр хамгийн их яригдсан тамирчдын нэг болгожээ. Ийнхүү Alysa Liu Олимпын алтан медалийг хүртэхийн зэрэгцээ цахим орчинд ч нөлөөллөө тэлж, шинэ үеийн спортын оддын нэгээр тодорч байна.
