Дэлхийн цаг уурын байгууллагаас 2025 оныг түүхэнд бүртгэгдсэн хамгийн дулаан гурван жилийн нэг болсныг албан ёсоор баталлаа. Дэлхийн цаг уурын байгууллагын (ДЦУБ) найман өөр өгөгдлийн цуваанд тулгуурласан нэгдсэн шинжилгээгээр дэлхийн дундаж гадаргын температур нь 1850-1900 оны (аж үйлдвэржилтийн өмнөх үе) дундажтай харьцуулахад 1.44 °C-аар (±0.13 °C хазайцтай) дулаарсан байна.
Эдгээр найман өгөгдлийн цувааны хоёр нь 2025 оныг 176 жилийн хэмжилтийн түүхэн дэх хоёр дахь хамгийн дулаан жил, харин үлдсэн зургаа нь гурав дахь хамгийн дулаан жил гэж тус тус ангилжээ. 2023-2025 онууд бүх найман өгөгдлийн цуваан дахь хамгийн дулаан гурван жил боллоо.
2023-2025 оны нийлбэр гурван жилийн дундаж температур нь аж үйлдвэржилтийн өмнөх үеэс 1.48 °C-аар (±0.13 °C) их байна. Мөн сүүлийн арван нэгэн жил (2015–2025) нь бүх найман өгөгдлийн цуваан дахь хамгийн дулаан жилүүд байсныг мэдээллээ.
