Францын Засгийн газар 15-аас доош насны хүүхдүүдийн сошиал сүлжээний хэрэглээг хязгаарлах хуулийн төслийг хэлэлцэж байна. Тус хуулийн төсөл нь хүүхдүүдийг цахим орчинд үзүүлэх сөрөг нөлөөллөөс хамгаалах, сэтгэцийн эрүүл мэндийг дэмжих зорилготой аж.
Францын Ерөнхийлөгч Эммануэль Макрон болон Засгийн газрын зүгээс TikTok, Instagram, Snapchat зэрэг сошиал платформуудыг 15-аас доош насныханд ашиглуулах тохиолдолд эцэг эхийн заавал зөвшөөрөл шаарддаг болох, мөн хэрэглэгчийн насыг баталгаажуулах зохицуулалтыг хуульчлах санал дэвшүүлээд байна. Үүний зэрэгцээ насны шалгалтыг хангалттай хэрэгжүүлээгүй сошиал платформуудад торгууль ногдуулах асуудлыг ч хэлэлцэж байгаа юм.
Францын эрх баригчид сошиал сүлжээ нь хүүхдүүдийн сэтгэцийн эрүүл мэндэд сөргөөр нөлөөлж, кибер дээрэлхэлт, өөрийгөө гэмтээхтэй холбоотой агуулгад өртөх эрсдэлийг нэмэгдүүлж байгааг онцолж байна. Иймд хүүхдийн эрх, аюулгүй байдлыг хамгаалах зорилгоор сошиал орчинд төрийн зохицуулалт, хяналтыг нэмэгдүүлэх шаардлагатай гэж үзжээ.
Одоогийн байдлаар уг зохицуулалт нь 15-аас доош насныхны сошиал сүлжээг бүрэн хориглох бус, эцэг эхийн хяналт, платформуудын хариуцлагыг нэмэгдүүлэхэд чиглэж байгаа бөгөөд хуулийн төслийг парламентын түвшинд хэлэлцэж эхлээд байна.
