Дэлхий дахинд уур амьсгалын өөрчлөлт, газрын гадаргын дулаарлаас үүдэлтэй эдийн засгийн эрсдэл нэмэгдэж буйг байгаль орчин, уур амьсгалын өөрчлөлтийн салбарын мэргэжилтнүүд анхаарууллаа.
Дэлхийн эдийн засгийн форумын хүрээнд Швейцарын Давос хотноо зохион байгуулагдсан гангийн асуудлаарх манлайлагчдын уулзалтаар жил бүр ойролцоогоор 55 сая хүн гангийн нөлөөнд өртөж, амьжиргаа нь эрсдэлд орж байгааг онцолсон байна.
Монгол Улс Талуудын 17 дугаар бага хурлын (COP17) хүрээнд Нэгдсэн Үндэстний Байгууллагын гишүүн орнуудын зөвшилцлийг дэмжих, олон талт хамтын ажиллагааг эрчимжүүлэхэд манлайлан оролцож байгааг Байгаль орчин, уур амьсгалын өөрчлөлтийн дэд сайд мэдэгдэв.
Олон улсын байгууллагуудын судалгаагаар ган, усны хомсдол, хүнс, хөдөө аж ахуйн салбарын алдагдлаас үүдэх хохирол жилд 307 тэрбум ам.долларт хүрч, хөгжлийн түвшнээс үл хамааран улс орнуудад “чимээгүй гамшиг” болон хувирч байгааг дурдлаа. Энэхүү асуудлаарх зөвшилцөл, итгэлцлийг нэмэгдүүлэх нь Монгол Улсын олон улсын нэр хүндийг өсгөхөөс гадна COP17-ыг түүхэнд үлдээх чухал алхам хэмээн уулзалтад оролцогчид тэмдэглэсэн байна.
