Даваа гараг олон хүний хувьд ажлын долоо хоногийн хамгийн хүнд өдөр байж болох юм. Энэхүү хандлагыг нийгмийн түвшинд баталсан нэг жишээ нь 2022 онд Гиннесийн амжилт бүртгэлийн хороо даваа гарагийг “хүмүүсийн хамгийн дургүй өдөр” хэмээн нэрлэсэн явдал юм.
Ажиллах хүчний дунд даваа гарагтай холбоотой түгшүүр, ядаргаа түгээмэл ажиглагддаг. Ажилтнуудын тодорхой хэсэг энэ өдрийг хамгийн их стресстэйгээр хүлээж авдаг бөгөөд өвчтэй гэж чөлөө авах, бүтээмж буурах зэрэг үзүүлэлт даваа гарагт өндөр байдаг нь анзаарагддаг байна. Түүнчлэн зарим эрүүл мэндийн үзүүлэлтүүдийн эрсдэл долоо хоногийн бусад өдрүүдтэй харьцуулахад даваа гарагт илүү өндөр байдгийг судалгаанууд харуулсан байдаг.
Сэтгэлзүйн мэргэжилтнүүдийн тайлбарласнаар “даваа гарагаас айх айдас” нь сэтгэцийн эмгэг бус харин амралтын горимоос ажлын горимд шилжих үеийн сэтгэлзүйн зохицлын асуудал юм. Амралтын өдрүүдэд хүний ажил, амьдралын хэмнэл сулардаг бол даваа гарагт хариуцлага, төлөвлөгөө, хяналт зэрэг хүчин зүйлс нэгэн зэрэг идэвхжиж, тархинд нэмэлт ачаалал үүсгэдэг байна.
Гэсэн ч даваа гараг мэдээж бүх хүнд сөрөг өдөр биш юм. Учир нь энэ өдөр шинэ зүйлийг эхлэх сэтгэлзүйн холбоосыг үүсгэдэг бөгөөд долоо хоногийн эхэнд хүмүүс өмнөх алдаа дутагдлаа засах, зорилгоо дахин тодорхойлох хандлагатай байдаг нь тогтоогдсон.
Дүгнэвэл, даваа гараг өөрөө асуудал биш. Харин амралтаас ажлын горимд хэрхэн шилжиж байна вэ гэдгээс тухайн өдрийн сэтгэлзүйн нөлөө шалтгаалдаг байх нь ээ.