Үтрээний үрэвсэл гэж юу вэ?
Үтрээний үрэвсэл (vaginitis) нь үтрээний салст бүрхэвч цочирч, үрэвссэнээс үүдэн загатнах, ялгадас ихсэх, эвгүй үнэр гарах, хорсох зэрэг шинж тэмдгээр илэрдэг нийтлэг эмэгтэйчүүдийн өвчин юм. Амьдралынхаа аль нэг үед ихэнх эмэгтэйчүүд дор хаяж нэг удаа энэ зовиурыг мэдэрдэг. Хамгийн чухал нь эрт анзаарч, зөв эмчлүүлэх ёстой эрүүл мэндийн асуудал юм.
Үтрээ нь өөрийн гэсэн бичил орчин, ашигтай нянгийн тэнцвэртэй байдаг. Харин энэ тэнцвэр алдагдах үед үрэвсэл үүсэх нөхцөл бүрддэг.
Ямар шалтгаанаар үүсдэг вэ?
Үтрээний үрэвсэл дараах шалтгаануудын улмаас үүсч болно. Үүнд:
- Бактерийн тэнцвэр алдагдах (ашигтай нян багасах)
- Мөөгөнцрийн халдвар
- Вирус, бэлгийн замын халдвар
- Ариун цэврийн буруу дадал (дотуур угаалга их хийх, тохиромжгүй саван хэрэглэх)
- Дааврын өөрчлөлт (жирэмслэлт, төрсний дараа, стресс)
- Дархлаа сулрах, антибиотик удаан хэрэглэх
Үндсэн шинж тэмдгүүд
Үтрээний үрэвслийн үед илрэх шинж тэмдгүүд нь шалтгаанаасаа хамааран өөр өөр байж болох ч дараах нийтлэг зовууриуд ажиглагддаг.
1. Үтрээний ялгадас өөрчлөгдөх
Эрүүл үед ялгадас тунгалаг эсвэл сүүн цагаан, үнэргүй эсвэл сул үнэртэй байдаг. Харин үрэвслийн үед:
- Ялгарах хэмжээ хэт ихсэх
- Шар, ногоон, саарал өнгөтэй болох
- Хөөсөрсөн, өтгөн, бяслаг шиг бүтэцтэй болох
- Загас шиг эсвэл исэлсэн эвгүй үнэр гарах
2. Загатнах, халуу оргих
Үтрээ болон гадна бэлэг эрхтний орчим загатнах, түлэгдэж буй мэт халуун оргих мэдрэмж төрдөг. Ялангуяа мөөгөнцрийн гаралтай үед шөнийн цагаар илүү зовуурьтай болдог.
3. Шээх үед хорсох
Үрэвссэн салст цочирсноор шээхэд шатах, хорсох мэдрэмж илэрнэ. Зарим тохиолдолд давсаг, шээсний сүвийн үрэвсэлтэй хавсарч болдог.
4. Бэлгийн харьцааны үед өвдөх
Үтрээ хуурайшиж, эмзэг болсноор бэлгийн хавьтлын үед өвдөлт, таагүй мэдрэмж төрж болно. Энэ нь сэтгэл зүйн дарамт үүсгэх шалтгаан ч болдог.
5. Улайж, хавдах
Гадна бэлэг эрхтэн улайж, хавдаж, хүрэхэд эмзэгших нь үрэвслийн илэрхий шинж тэмдэг юм.
Хэзээ заавал эмчид хандах вэ?
Дараах тохиолдолд заавал мэргэжлийн эмчид үзүүлэх хэрэгтэй.
- Ялгадас хүчтэй эвгүй үнэртэй болсон
- Загатнах, хорсох нь өдөр тутмын амьдралд саад болж эхэлсэн
- Шинж тэмдэг давтагдаж байгаа
- Жирэмсэн үед зовуурь илэрсэн
- Өөрөө эм хэрэглэсэн ч сайжрахгүй байгаа
Урьдчилан сэргийлэх зөвлөмж
Үтрээний эрүүл мэндээ хамгаалахын тулд:
- Ариун цэврийн зөөлөн, үнэргүй бүтээгдэхүүн хэрэглэх
- Дотуур угаалгыг байнга хийхээс зайлсхийх
- Амьсгалдаг, хөвөн дотуур хувцас өмсөх
- Антибиотикийг эмчийн зааваргүй удаан хэрэглэхгүй байх
- Биеийн дархлаагаа дэмжих, стрессээ зохицуулах
Үтрээний үрэвсэл нь олон эмэгтэйд тохиолддог, эмчлэгдэх бүрэн боломжтой өвчин юм. Хамгийн чухал нь биеийнхээ дохиог үл тоомсорлон, ичиж нуухгүйгээр цаг тухайд нь мэргэжлийн эмчид хандаарай.
HUMANZ
SEX EDUCATION
