Өмнөд Солонгост энэ оны гуравдугаар сарын 1-нээс эхлэн сургуулийн анги танхимд гар утас болон ухаалаг төхөөрөмж ашиглахыг хуулиар хориглох шийдвэрийг албан ёсоор хэрэгжүүлэхээр болжээ. Тус улсын Үндэсний Ассамблей 2025 оны наймдугаар сард холбогдох хуулийн өөрчлөлтийг баталсан бөгөөд энэ нь хичээлийн үеэр сурагчдын анхаарал төвлөрөл, сурлагын чанарыг сайжруулахад чиглэсэн бодлогын арга хэмжээ хэмээн үзэж буй.
Шинэ зохицуулалтаар бага, дунд, ахлах сургуулийн сурагчид анги дотор гар утас ашиглахыг хориглох бөгөөд өсвөр үеийнхний дунд нэмэгдэж буй гар утас, сошиал медиа хэт хэрэглээ нь суралцах үйл явцад сөргөөр нөлөөлж, сэтгэл зүй болон төвлөрөх чадварыг сулруулж байна гэж хууль санаачлагчид онцолжээ. Өмнө нь зарим сургууль дотоод журмаараа утас хэрэглэхийг хязгаарлаж байсан ч энэ удаад уг зохицуулалт улс даяар нэгдсэн, хуульчилсан хэлбэрт шилжиж байгаа юм.
Гэсэн ч яаралтай нөхцөл байдал, сургалтын тусгай хэрэгцээ, эсвэл тусгай хэрэгцээтэй сурагчдын хувьд гар утас ашиглах боломжийг тодорхой нөхцөлтэйгээр үлдээхээр заасан байна. Ингэснээр хориг нь бүх нөхцөлд хатуу мөрдөгдөх бус, боловсролын бодит хэрэгцээтэй уялдуулан хэрэгжих юм.
Өмнөд Солонгосын энэхүү шийдвэр нь хүүхэд, өсвөр үеийнхний дижитал орчны хэрэглээг зохицуулах төрийн оролцооны нэг жишээ болж, бусад улс оронд ч ижил төстэй хэлэлцүүлэг өрнөх үндэслэл болж байна. Боловсролын салбарынхан энэхүү бодлого нь анги танхим дахь суралцах орчныг сайжруулж, багш, сурагчдын харилцааг илүү сайн үр дүнд хүргэнэ гэж найдаж буйгаа илэрхийлжээ.
