1912 оны дөрөвдүгээр сарын 14-нд Саутхамптоноос Нью-Йорк руу аялж явсан Титаник хөлөг мөсөн уул мөргөж, сүйрсэн билээ. Хөлөгт 1500 гаруй зорчигчтой явсны дотор чинээлэг эрхэм Исидор Страус болон түүний эхнэр Ида нар аялж яваад мөн осолдсон. Исидор Страусын цогцсыг сүйрлээс хэдхэн хоногийн дараа Атлантын далайгаас олсон аж. Харамсалтай нь Идагийн цогцос одоог хүртэл олдоогүй аж.
“Henry Aldridge & Son” компанийн зүгээс Ноён Исидор Страусын алтан цагийг энэ сарын 22-нд дуудлагаар худалдана хэмээн мэдээлсэн. Эл цаг “Jules Jurgensen” брэндийн халаасны цаг бөгөөд 18 каратын алтан хийцтэй. Дуудлага худалдаагаар 1.3 сая ам.доллар хүрэх магадлалтай гэж шинжээчид таамаглаж байна.
Уг цагийг 1888 онд Ида нөхөртөө бэлэглэсэн гэж үздэг. Цаган дээр Страусын нэрний эхний үсгүүдийг сийлсэн байдаг. Цагийг Атлантын далайгаас гаргаж авсны дараа гэр бүлд нь буцаан өгч, үе дамжин өвлөгдсөөр өнөөг хүрчээ. Харин Исидор Страусын гуч хүү Кеннет Холлистер Страус цагийг сэргээн засварлуулсан байна.
Халаасны цаг 02:20 цагийг заан зогссон байсан. Энэ нь Титаник хөлөг живсэн эцсийн мөчийг илтгэнэ хэмээдэг.
“Henry Aldridge & Son” компанийн мэдээлснээр цагийг дангаар зарахгүй бөгөөд Идагийн бичсэн тэмдэглэлийн хамт зарах аж. Уг тэмдэглэлд “Ямар гайхалтай хөлөг вэ! Аварга том, бас тансаг тохижилттой. Өрөөнүүдийг хамгийн мэдрэмжтэйгээр, хамгийн тансагаар тохижуулжээ” хэмээн хөлөг онгоцны тансаг сайхан байдлыг дүрслэн бичсэн аж.
Энэхүү цаг нь Титаникаас үлдсэн хамгийн үнэтэй эд өлгийн зүйлсийн нэг болох төлөвтэй байна. Дуудлага худалдааны мэдээ дэлхийн өнцөг булан бүрт байгаа цуглуулагчид, үйлчлүүлэгчдэд хэдийнэ хүрчээ.
Ноён Страус нь Баварид төрсөн америк бизнес эрхлэгч, улстөрч, Нью-Йорк дахь “Macy’s” худалдааны төвийн хамтран эзэмшигч байжээ. Исидор Страус, Ида нар Нью-Йоркдоо тун алдартай хосууд байсан гэдэг. Тийм ч учраас найруулагч Жеймс Камерун тэднийг кинондоо дүрслэн оруулсан билээ. Хөлөг живэх үед эхнэр нь аврах завинд суухаас татгалзсан учир эцсийн мөчөө хүртэл хамтдаа тэврэлдэн хэвтдэг ахимаг насны хосыг үзэгчид санаж байгаа болов уу. Тэд бол Исидор, Ида нар юм.
