Австрийн нэрт зураач Густав Климтийн зургаан фут өндөр “Элизабет Ледерерийн хөрөг” хэмээх бүтээл ирэх долоо хоногт Sotheby’s дуудлага худалдаанд гарах гэж байна. Энэхүү бүтээл нь 150 сая ам.доллар буюу түүнээс дээш үнээр зарагдан, Климтийн дээд амжилтыг эвдэхээр хүлээгдэж байна.
Хоёр жилийн өмнө уран бүтээлчийн “Сэнс барьсан эмэгтэйн хөрөг” хэмээх сүүлчийн бүтээл 108 сая ам.доллараар зарагдаж, Климтийн хувьд хамгийн өндөр үнээр борлогдсон уран зураг болсон билээ.
“Элизабет Ледерерийн хөрөг” нь Нацистуудын эзлэн түрэмгийллийн үед дээрэмдэгдэж, Дэлхийн II дайны үеэр бараг устах шахсан ховор бүтээл юм. Урт хугацаанд олон нийтэд бараг үзэгдээгүй энэ зураг Estee Lauder брэндийн өв залгамжлагч Леонард А. Лаудерийн хувийн цуглуулгад хадгалагдаж байгаад, түүний нас барсны дараа худалдаанд гарч байгаа аж.
Климт уг хөргийг 1918 онд, нас барахаасаа хоёр жилийн өмнө зуржээ. Тэрээр ивээн тэтгэгчдийнхээ охин Элизабет Ледерерийг Хятадын урлагийн сэдэлтэй, чимэг хээтэй тунгалаг нөмрөгтэй дүрсэлсэн байна. Энэхүү зураг олон жилийн турш Лаудерийн Нью-Йорк дахь гэрийн хананд өлгөөтэй байсан бөгөөд 2017 онд Канадын Үндэсний урлагийн галерейд түр хугацаанд зээлдүүлж байжээ.
Элизабет Ледерер тухайн үед дөнгөж 20 настай байсан бөгөөд амьдралынхаа турш олон бэрхшээл туулж, дайны өмнө бүхнээ алдсан хэмээн түүхэнд тэмдэглэгддэг.
Лаудер энэ хөргийг 1980-аад онд худалдаж авч, цуглуулгандаа багтаасан байна. Климтийн бүтээлүүдийн дундаас энэ хөрөг нь түүний “алтлаг үе”-ийн бүтээлүүд болох “Үнсэлт” болон “Аделе Блох-Бауэр I-ийн хөрөг”-тэй харьцуулахад илүү уран хөдөлгөөнтэй, дорнын урлагийн нөлөө бүхий зөөлөн өнгө аястай аж.