Өмнөд Солонгосын дуучин Хёна (HyunA) 2025 оны арваннэгдүгээр сарын 9-ний өдөр Макао хотод болсон “WATERBOMB 2025” хөгжмийн наадмын тайзан дээр ухаан алдаж унажээ. Тэрбээр “Bubble Pop” дуугаа дуулж байх үедээ гэнэт ухаан алдаж, туслахуудын тусламжтайгаар тайзнаас буусан байна. Дуучныг эмнэлгийн үзлэгт оруулсны дараа ноцтой гэмтэл илрээгүй бөгөөд агентлагаас нь биеийн байдал нь тогтвортой байгааг мэдэгджээ.
Сүүлийн сар орчмын хугацаанд HyunA өөрийн Instagram хуудсаар дамжуулан “сарын дотор 10 килограмм жин хаясан” талаар бичиж, зургаа нийтэлж байсан нь олон нийтийн анхаарлыг татсан юм. Түүнийг хэт туранхай болсон талаар фэнүүд санаа зовниж байсны зэрэгцээ мэргэжилтнүүд богино хугацаанд хэт их жин хасах нь эрүүл мэндэд ноцтой эрсдэл үүсгэдэг гэж анхааруулжээ.
Эрүүл мэндийн шинжээчдийн тайлбарласнаар, богино хугацаанд хурдан жин хасах нь хүний биеийн ус болон электролитийн тэнцвэрийг алдагдуулж, цусны даралт унах, тархины цусан хангамж доголдох, улмаар ухаан алдах эрсдэл үүсгэдэг байна. Мөн булчингийн масс алдагдаж, хөдөлгөөний чадвар буурах, сэтгэл санааны тогтворгүй байдал нэмэгдэх зэрэг шинж тэмдэг илэрч болзошгүй гэжээ.
HyunA тайзан дээр болсон үйл явдлын дараа Instagram хуудастаа “Би юу болсон тухай сайн санахгүй байна. Үнэхээр уучлаарай” гэж бичсэн бөгөөд ойрын хугацаанд төлөвлөгдсөн тоглолтуудаа түр хойшлуулахаар болсон байна.
2007 онд Wonder Girls хамтлагийн гишүүнээр урлагийн гараагаа эхэлсэн HyunA нь хожим 4Minute, Trouble Maker, Triple H зэрэг төсөлд оролцож, сүүлийн жилүүдэд соло уран бүтээлээрээ олон улсын нэр хүндтэй болж чадсан уран бүтээлч юм.
