Хятадын технологийн аварга Baidu дэлхий даяар роботакси үйлчилгээгээ өргөжүүлж буй. 10-р сарын 31-ний байдлаар долоо хоногийн бүрэн автомат, жолоочгүй тээврийн захиалгын тоо 250 мянгад хүрсэн талаар Apollo Go-ийн төлөөлөгч мэдээллээ.
“Baidu”-ийн роботакси үйлчилгээний дэвшил нь Хятад, АНУ-ын компаниуд хиймэл оюун ухаан, цахилгаан автомашин, бүрэн автомат жолоодлогын технологийн салбарт тэргүүлэх байр суурь эзлэхийн төлөө өрсөлдөж буй энэ үед тохиож байна.
Apollo Go одоогоор Ухань, Бээжин, Шанхай, Шэньжэнь хотуудын тодорхой хэсгүүдэд голлон ажиллаж байгаа бөгөөд Хонг Конг, Дубай, Абу Даби, Швейцарь зэрэг улс, бүс нутгуудад ч мөн үйл ажиллагаагаа өргөжүүлж байгаа аж. Роботакси үйлчилгээ нь ихэвчлэн орон нутгийн зохицуулагч байгууллагаас зөвшөөрөл авахын өмнө олон нийтэд зориулсан туршилтын шат дамжлагыг давах шаардлагатай. Baidu-ийн мэдээлснээр Apollo Go-ийн нийт 17 сая роботакси захиалга хийгдээд байгаа бөгөөд автомашинууд нь нийтдээ 240 сая километр (149 сая миль) зам туулжээ. Үүнээс 140 сая нь бүрэн жолоочгүй горимд явагдсан байна.
Аюулгүй байдлын талаарх мэдээллээр, Apollo Go-ийн автомашин бүр дунджаар 10.1 сая километр тутамд нэг удаа агаарын дэр (airbag) ажилласан тохиолдол бүртгэгдсэн ч, хүний амь нас эсвэл ноцтой бэртэл дагуулсан осол гараагүй гэж мэдэгдээд байгаа юм.
Baidu компани ирэх 11-р сарын 18-нд, АНУ-ын зах зээл нээгдэхээс өмнө улирлын тайлангаа зарлах бол, жилийн технологийн бага хурлаа 11-р сарын 13-нд Бээжинд зохион байгуулахаар төлөвлөж байна.
