Мексикийн умард хэсгийн хуурай Чихуахуаны цөлд байгаль хамгаалагчид болон нутгийн иргэд мөхлийн ирмэгт буй сарьсан багваахайг хамгаалах зорилгоор мянга мянган агава ургамал тарьж байна. Энэ нь зөвхөн амьтдыг аврах биш, мөн Мексикийн үндэсний ундаа “текилагийн ирээдүй”-г хамгаалах хүчин чармайлт юм.
Хаврын сүүлээр, Мексикийн өмнөдөөс АНУ-ын баруун өмнөд хэсэг рүү 1600 км гаруй аялдаг эм сарьсан багваахайнууд хоол хүнс эрэхдээ агавагийн цэцэгнээс бал сорж, тоос хүртээлцэх үүрэг гүйцэтгэдэг. Агавагийн шар үслэг цэцэг нь ургамлын амьдралд зөвхөн нэг удаа гарч ирдэг, харин энэ нь текилагийн гол түүхий эд юм.
Гэвч сүүлийн жилүүдэд зэрлэг агавагийн тоо буурч, 168 зүйлийн судалгаагаар 42 нь устах аюулд оржээ. Үүнтэй зэрэгцэн агавагаар хооллодог сарьсан багваахай ч цөөрч байна. Иймээс байгаль хамгаалагчид нутгийн иргэдтэй хамтран агавагийн тоог нэмэгдүүлэх хөтөлбөр хэрэгжүүлж байгаа нь амьтан, ургамал хоёуланд ашигтай шийдэл болжээ
1988 онд ердөө мянган ширхэг байсан “бяцхан урт хамарт сарьсан багваахай”-ны тоо өнөөдөр 200 мянгад хүрч өссөн бол, “мексикийн урт хамарт сарьсан багваахай” сүүлийн 20 жилд 50 хувиар буурч, устах аюулд орсон хэвээр байна.
Мэргэжилтнүүдийн хэлснээр агавагийн хэт олборлолт, хуурайшилт, цаг уурын өөрчлөлт нь экосистемийг хамгийн ихээр мохоож байгаа бөгөөд “хэрвээ сарьсан багваахай байхгүй бол текила ч үгүй болно” гэж анхааруулж байна.
