АНУ-ын Үндэсний Агаар, Сансрын агентлаг (NASA)-ийн түр орлон гүйцэтгэгч захирал, Тээвэрийн нарийн бичгийн дарга Шон Даффи хоёр долоо хоногийн өмнө “Америкийн сансрын нисгэгчдийг дахин Саран дээр буулгах гэрээг нээж үзнэ” хэмээн мэдэгдсэнээс хойш, SpaceX компани үүнд хариу болгон яагаад тэд энэ үүргийг гүйцэтгэхэд хамгийн тохиромжтой болохыг тайлбарлалаа.
Пүрэв гарагт тус компани “To the Moon and Beyond” (“Сар руу болон түүнээс цааш”) нэртэй блог нийтэлж, “Хүн төрөлхтөн нэгэн шинэ үеийн зааг дээр ирээд байна. Анх удаа бид дэлхийгээс цааш, оршин тогтнож болохуйц байнгын хүний суурин байгуулах боломж, технологи, хүсэл зоригийг зэрэгцүүлэн эзэмшиж байна” хэмээн бичжээ.
SpaceX-ийн үзэж буйгаар, энэ удаагийн Artemis III болон Artemis IV хөтөлбөрүүд нь Апполоны адил зүгээр л туг хатгах биш, харин Саран дээр байнгын бааз байгуулах суурийг тавих зорилготой юм. Компани “Starship” хөлөг нь сарыг судлахад хамгийн дэвшилтэт, хүчин чадал өндөр хөлөг болохыг онцолсон бөгөөд 2026 онд хэрэгжүүлэх гол зорилтуудаа тойрог замын нислэг, түүний хоорондын шатахуун цэнэглэх туршилт багтаж буйг дурджээ.
“Starship бол хүнийг саран дээр буцаан хүргэх шууд зам бөгөөд Artemis хөтөлбөрийн үндсэн зорилго болох саран дээр хүмүүсийн тогтвортой, байнгын оршихуйн түлхүүр юм” гэж SpaceX мэдэгдсэн байна. Түүнчлэн тус компани Starship болон дэд бүтцийн хөгжүүлэлтийн зардлын 90 хувийг өөрсдөө дааж байгаа гэдгээ онцолжээ.
NASA 2021 онд Artemis III даалгаварт зориулсан буултын хөлгөөр SpaceX-ийн Starship-ийг сонгосон бөгөөд уг сонголт “шударга, нээлттэй өрсөлдөөний үр дүнд” хийгдсэн гэж компанийн мэдэгдэлд дурдсан байна. “SpaceX-ийн санал нь техникийн болон менежментийн үнэлгээгээр хамгийн өндөр оноо авч, зардлын хувьд ч бусад өрсөлдөгчдөөс хавьгүй бага байсан” гэжээ.
Мөн NASA Artemis IV хөтөлбөрийн Сарны буултын хөлгийг нийлүүлэх гэрээг мөн SpaceX-тэй байгуулсан бөгөөд тус компани одоогоор **49 хөгжүүлэлтийн үе шатны зорилт** биелүүлж байгааг мэдэгдсэн байна. Эдгээр зорилтуудын ихэнх нь “хугацаандаа эсвэл товлосноос өмнө” хийгдсэн гэж SpaceX тайлбарлажээ.
Ингэснээр SpaceX өөрийн Starship хөтөлбөрийн амжилтаараа Сар руу буцах өрсөлдөөнд тэргүүлэх байр сууриа бататгалаа. Эх сурвалж: BBC news
