Их Британийн Хааны зоосны ордон “Live Aid” концертод толилуулсан Фредди Меркьюригийн домогт тоглолтын 40 жилийн ойд зориулан шинэ зоос гаргажээ.
Зоосны нүүрэн талд “Queen” хамтлагийн гочлол дуучин Фредди Меркьюри тоглолтынхоо үеэр микрофоноо атган толгойгоо хойш гэдийлгэн зогсож байгаа байдалтайгаар дүрсэлжээ. Түүнийг тойруулсан ноотны шугам нь дөрвөн октавын дуу хоолойнх нь цар хүрээг бэлгэдсэн дүрстэй. Эдгээр зоосыг Хааны зоосны ордны цахим хуудсаар дамжуулан худалдаанд гаргаж байгаа бөгөөд гүйлгээнд гаргаагүй 5 фунт стерлингийн хувилбарын үнэ 18.50 фунт стерлингээс (24.4 ам.доллар) эхлэх аж. Харин 2 унцын алтан зоос нь 9350 фунт стерлингийн (12 315 ам.доллар) үнэтэй.
Анхны зоосыг өнгөрсөн долоо хоногт Уэльс дэх Хааны зоосны газарт Меркьюригийн эгч Кашмира Булсара цутгасан бөгөөд тэрбээр хэлэхдээ “Фредди залуугаараа хорвоог орхисон тул хөгжмийн авьяасаа үнэлүүлж Хааны одонг хүртэх боломж олдоогүй. Тиймээс Хааны зоосны ордноос ийм зоос гаргасан нь маш зөв хүндэтгэл” хэмээжээ.
Фредди Меркьюри ХДХВ-ийн халдвар авсан гэдгээ олон нийтэд зарласнаас хойш нэг хоногийн дараа 1991 онд 45 насандаа таалал төгссөн.
Хааны зоосны ордон мөн тусгай алтан хувилбарыг ДОХ болон ХДХВ-ийн халдвартай хүмүүст тусламж үзүүлдэг буяны байгууллага болох “Mercury Phoenix Trust”-д хандивлах ажээ.
Их Британийн Хааны зоосны ордны дурсгалын зоосны газрын захирал Ребекка Морган “‘Домогт дуучны шүтэн бишрэгчид “ийм зоос гаргахыг олон жил хүссэн байх, 1985 оны “Live Aid” тоглолтын үеэр Меркьюри тайзнаас үзэгчдийг байлдан дагуулснаас хойш 40 жил өнгөрч байгаа бөгөөд энэ тоглолтыг олон хүн бүх цаг үеийн хамгийн шилдэг амьд тоглолт хэмээн үнэлдэг тйимээс энэ жил түүнд зориулсан дурсгалыг зоос гаргах нь хамгийн зөв санагдсан” гэжээ.