Кино ертөнц үзэгчдэд адреналинаар дүүрэн, айдас төрүүлэм мөчүүдийг бэлэглэж ирсэн. Зарим нь цочоомоор аймшигтай дүрслэлтэй, зарим нь сэтгэл зүйн гүнзгий түгшүүрийг өдөөхөөр бүтсэн байдаг. Доорх 10 хэсэг бол кино түүхэнд хамгийн аймшиг төрүүлсэн, мартагдашгүй мөчүүдийн нэг хэсэг юм.
- “Mulholland Drive” (2001) – Цайны газрын хар дарсан зүүд
Дэвид Линчийн энэхүү кино 21-р зууны шилдэг бүтээлээр нэрлэгдсэнээс гадна хамгийн аймшигтай киноны нэг. Лос-Анжелесийн нэгэн цайны газар хоёр найз зүүдний тухай ярилцаж буй жирийн мэт хэсэг хэдхэн минутын дараа үзэгчдийг айдсаар хөлдөөнө. Харагдаж буй зүйл энгийн боловч Линчийн бүтээсэн айдсын уур амьсгал, хурцадмал хүлээлт үзэгчийг яг л хар дарсан зүүдэнд орсон мэт мэдрэмж төрүүлдэг.
2. “Ringu” (1998) – Садакогийн үхлийн үзэгдэл
Японы 1990-ээд оны үеийн энэ аймшгийн кино нь нам гүм мөртлөө сэтгэл түгшээм бүтээл. Үхлийн хараал шингэсэн бичлэг тоглож эхлэхэд, Садако дэлгэцнээс мөлхөн гарч ирэх мөч дэлхий даяарх үзэгчдийг цочроосон. Хар нөмрөг, нүдийг нь дарсан үс, нэг ширүүн харц – бүгд бодит айдсыг төрүүлнэ. Энэхүү үзэгдэл “вируст” мэдээллийн аюулыг кино урлагт анх харуулсан гэдгээрээ түүхэнд үлдсэн.
3. “The Lord of the Rings: The Fellowship of the Ring” (2001) – Билбогийн аймшигт хувиралт
Питер Жексоны домогт гурвалын эхний ангид нэгэн богинохон, гэхдээ жинхэнэ цочоом мөч гардаг. Ривенделлд Фродо болон Билбо уулзах үед Билбо бөгжийг хармагц гэнэт царай нь зэрлэг, шунахай дүрээр хувирна. Энэ гэнэтийн хувиралт нь үзэгчдийг цочоож, ирэх аймшигт үйл явдлын урьдчилсан дохио болдог.
4. “Eighth Grade” (2018) – Аймшигтай машин доторх мөч
Бо Бөрнамын өсвөр насны охины тухай энэ кино цус, хүчирхийлэлгүй ч бодит айдас төрүүлдэг. 13 настай Кэйла хэмээх охин ахмад хүүтэй хамт машинд суух үед нөхцөл байдал аажмаар түгшүүртэй болно. Хүүгийн “үнэн эсвэл зориг” тоглоомын халдлагад охин өөрийгөө хамгаалан татгалзах мөч нь хамгийн аймшигтай хэсэг – ямар ч дуу чимээ, аймшгийн эффектгүй, бодит амьдралын айдсыг харуулдаг.
5. “The Witch” (2015) – “Peek-a-boo” тоглоомын хар төгсгөл
17-р зууны Шинэ Англид өрнөх энэ кино нь шашны айдас, мухар сүсэг, эзэнгүй зэлүүд байгаль дундах аймшгийг харуулдаг. Томасин гэх охин дүүтэйгээ “peek-a-boo” тоглож байтал нүднийх нь өмнө хүүхэд гэнэт алга болдог. Үүний дараа гардаг үзэгдэл үзэгч бүрийн зүүдэнд ормоор. Энэ мөч киноны бүх айдсын эхлэл юм.
6. “Coraline” (2009) – “Өөр эх”-ийн товч нүдний аймшиг
Stop-motion анимэйшн кинонууд айдас төрүүлдэг гэдгийг “Coraline” баталсан. Үндсэн баатар Coraline өөр ертөнцөд хачин төгс амьдралтай “Өөр эх”-ийг олдог ч тэр ертөнц аймшиг болж хувирна. Төгсгөлийн хэсэгт муур “Өөр эх”-ийн товч нүдийг урах мөч нь айдас төрүүлэм бөгөөд хүүхэд наснаас хойш олон үзэгчийн сэтгэлд хоногшсон үзэгдэл болсон.
7. “Terminator 2: Judgement Day” (1991) – Цөмийн сүйрлийн зүүд
Жэймс Камероны энэхүү хэсэг кино түүхийн хамгийн аймшигтай зүүдний үзэгдэлд тооцогддог. Сара Коннор цөмийн сүйрлийг зүүдэлж, Лос Анжелес бүхэлдээ галд автаж, цэцэрлэгийн хүүхдүүд шатаж буйг харна. Практик болон CGI эффектийн гайхамшгаар бүтсэн энэ үзэгдэл жинхэнэ тамыг дэлгэцэнд авчирсан мэт.
8. “Who Framed Roger Rabbit?” (1988) – Шүүгч Дүүмийн жинхэнэ дүр
Энэхүү хосолсон анимэйшн, бодит дүрслэлтэй кино хүүхдийн инээдтэй түүх мэт харагддаг ч төгсгөлд нь цэвэр айдас. Муу талын дүр Judge Doom уурын индүүгээр дайруулсны дараа өөрийгөө картун дүр гэж илчилдэг. Түүний улаан нүд, суналттай гар, хашгирах дуу нь тухайн үеийн хүүхдүүдийг үнэхээрийн айдаст автуулсан юм.
9. “Speak No Evil” (2022) – Үнэн аймшгийн илчлэлт
Энэхүү Дани–Нидерландын сэтгэл зүйн аймшгийн кино амралтаар танилцсан хоёр гэр бүлийн түүхээр дамжуулан айдас, эвгүйцлийг алхам алхмаар өсгөдөг. Найрсаг харилцаа хачирхалтай зан авир болон хувирч, төгсгөлийн хэсэгт жинхэнэ аймшиг илчлэгдэнэ. Энэ нь үзэгчдэд “үнэхээр хүн ийм зүйл хийж чадна гэж үү?” гэх бодлыг төрүүлдэг.
10. “Dreams” (1990) – “Улаан Фүжи” хэсэг
Акира Куросавагийн “Dreams” кино найман богино зүүднээс бүрддэг бөгөөд хамгийн аймшигтай нь “Mount Fuji in Red”. Цөмийн цахилгаан станц дэлбэрч, Фүжи уул улаан гэрэлд автах үед хүмүүс үймэн зугтана. Төгсгөлд хэдхэн хүн л үлдэж, цацраг идэвхийн утаа дунд мөхлийн тухай хүйтэн тайлбар сонсоно. Энэ хэсэг байгаль орчны сүйрлээс үүдэх айдсыг хамгийн хүчтэйгээр илэрхийлдэг.
Эх сурвалж: BBC new
