Сөүл хотод хэн ч юу ч хийхгүй буюу 90 минутын турш унтахгүй, утсаа шалгахгүй, ярихгүй байх тэмцээн зохиожээ. Ингэхдээ нийт оролцогчдын зүрхний цохилтыг хянах бөгөөд үзэгчид үйл явцыг харж байгаад 10 оролцогчдод саналаа өгдөг. Улмаар энэ цаг хугацаанд зүрхний цохилт нь хамгийн тогтвортой байсан 10 хүн ялагч болдог аж.
Тэмцээний зорилго нь чөлөө завгүй өнгөрөх энэ амьдралд “тархиа амрааж зүгээр суух, хийцгүй байх нь өнөө цагт хэвийн зүйл бөгөөд цагийг дэмий өнгөрөөж буй хэрэг огт биш, харин ч хурдтай, өрсөлдөөнтэй энэ нийгэмд энэхүү түр зогсолт илүү үнэ цэнтэй” гэдгийг ойлгуулах аж.
“SPACE OUT” тэмцээн жил бүр зохиогддог бөгөөд энэ жилийн оролцогчдын дунд Олимпийн хошой мөнгөн медальт Квак Юн Ги байсан байна.
Тэмцээнд оролцогчдын хувьд хичээл сурлагадаа цаг наргүй мэрийх, амжилтад хүрэхийн тулд хэт шаргуу хөдөлмөрлөх, үргэлж хэн нэгэнтэй өрсөлдөх зэрэг олон хүчин зүйлээс түр ч болов өөрсдийгөө чөлөөлөх арга нь энэхүү арга хэмжээ байсныг мөн дурджээ.
Энэ жилийн тэмцээний ялагч 35 настай Квон: “Солонгост хүмүүс юу ч хийхгүй бол арай л хоцрогдсон гэж боддог тийм л өрсөлдөөнтэй улс. Хүн бүр өөрийн гэсэн хурдтай байдаг шиг, заримдаа зүгээр л удаашрах, түр зогсох ёстой гэж би боддог. Юу ч хийхгүй байх нь биеийн эрүүл мэндэд сайнаар нөлөөлдөг. Учир нь таны бие тайвшрах ёстой. Гэхдээ таны бие зөвхөн тархи амарч байх үед л тайвширдаг”
