BBC телевиз мягмар гарагт мэдэгдэл хийхдээ “Doctor Who” дараа жилийн Зул сарын баяраар тусгай ангитайгаар гарахыг баталлаа. Энэхүү ангийг цувралын Рассел Т. Дэвис бичих аж.
Мөн тус корпораци ирэх улиралд “Disney+”-тэй хамтран ажиллахгүй гэдгээ зарлав. Сүүлийн хоёр улиралд уг стриминг платформ нь “Doctor Who”-гийн олон улсын нэвтрүүлгийн хамтрагч байжээ. Гэсэн хэдий ч продюсерууд “BBC уг цувралд бүрэн дүүрэн итгэлтэй хэвээр байгаа бөгөөд цаг хугацааны эзний адал явдлыг үргэлжлүүлэх дараагийн улирлын төлөвлөгөөг удахгүй зарлах болно” гэж мэдэгдэв.
BBC-ийн драмын захирал Линдсей Салт “Сүүлийн хоёр улирал болон тун удахгүй гарах “The War Between The Land And The Sea” спин-офф цувралын үеэр гайхалтай хамтран ажилласан Disney+ багт талархал илэрхийлж байна” хэмээн хэлжээ.
Гэсэн хэдий ч “Doctor Who” дараагийн удаа хэзээ бүрэн эргэн ирэх болон гол дүрд хэн тоглох нь одоогоор тодорхойгүй хэвээр байна. Зарим фенүүдийн санаа зовнилыг намжаах үүднээс Салт дараах мэдэгдлийг хийжээ:
“BBC ‘Doctor Who’-д бүрэн итгэлтэй хэвээр байгаа. Энэ бол бидний хамгийн хайртай драмуудын нэг хэвээр байгаа бөгөөд Рассел Т. Дэвис дахин нэг гайхалтай Зул сарын тусгай ангийг 2026 онд бичиж өгөхөөр зөвшөөрсөнд баяртай байна. Фенүүд санаа зоволтгүй. Доктор хаашаа ч яваагүй. Удахгүй бид дараагийн улирлын талаарх төлөвлөгөөг зарлах бөгөөд TARDIS BBC-ийн зүрхэнд хэвээр байх болно.”
Анх 1963 онд цацагдсан “Doctor Who” хамгийн сүүлд энэ оны тавдугаар сард гарсан бөгөөд тухайн үед гол дүрийн жүжигчин Нкутӣ Гатва шинэ Доктор болж Билли Пайпер руу хувирсан юм.
Өмнө нь Докторын туслах Роуз Тайлерын дүрийг бүтээж байсан Пайпер тухайн үед “Би эргэн ирж байгаадаа баяртай байна. Гэхдээ үзэгчид миний дүр юу хийхийг ‘хүлээгээд үзэх’ хэрэгтэй” гэж мэдэгдсэн. Түүний үгсээр бол тэр дараагийн буюу 16 дахь Доктор болох эсэх нь тодорхойгүй байна.
“The War Between The Land And The Sea* нэртэй спин-офф цувралд “Being Human” киноны жүжигчин Рассел Тови тоглох бөгөөд энэ оны сүүлээр BBC One-оор цацагдана. Мөн “Doctor Who”-гийн хүүхдийн анимэйшн хувилбар CBeebies сувагт зориулан хөгжүүлэгдэж байгаа аж.
