Энэ сарын 15-ны өдөр Солонгос улсад зохион байгуулагдсан хөхний хорт хавдрын эсрэг сайн үйлсийн үйл ажиллагаанд томоохон алдартнууд оролцсон. Гэвч тус үйл ажиллагаа нь сайн үйлсийн аян биш алдартнуудын үдэшлэг болон хувирсан нь олны дургүйцлийг маш их хүргэсэн билээ.
Компанийн зүгээс уг үйл явдал өнгөрсөн лхагва гарагт Сөүл хотод болж, цахим орчинд хүчтэй эсэргүүцэл дагуулснаас хойш дөрвөн хоногийн дараа уучлалт хүссэн байна.
> “2006 оноос хойш ‘Love Your W’ нь хөхний хорт хавдрыг эрт илрүүлэхийн ач холбогдлыг олон нийтэд ойлгуулахад анхаарч ирсэн,” гэж сэтгүүл мэдэгдэлдээ дурджээ. “Гэсэн хэдий ч энэ жилийн арга хэмжээний хэлбэр, уур амьсгал нь кампанит ажлын зорилготой нийцээгүй гэдгийг бид хүлээн зөвшөөрч, энэхүү асуудлыг ноцтойгоор авч үзэж байна.”
“Хамгийн чухал нь бид хөхний хорт хавдартай өвчтөнүүд болон тэдний гэр бүлийнхэнд ямар нэгэн зовиур, сэтгэл гомдол учруулсан байж болох бүхий л үйлдэлдээ гүнээ уучлал хүсэж байна. Мөн сайн санааны үүднээс оролцсон ч уг маргаанд өртсөн хүмүүст бас уучлалт хүсэж байна. Бид өөрсдийн дутагдлыг эргэцүүлэн бодож байна,” гэж мөн нэмжээ.
W Korea сэтгүүл цаашид ижил асуудал давтагдахаас сэргийлэхийн тулд арга хэмжээг зохион байгуулах, удирдах журмаа дахин хянах төлөвтэй байгаагаа мэдэгдсэн байна. Тэд мөн тус арга хэмжээнд холбогдох бүх бичлэг, зураг зэргийг Instagram хаягаасаа устгажээ.
Гэсэн хэдий ч уучлалт нь олон асуултад хариулт өгөлгүй үлдсэн байна — ялангуяа яг хэдий хэмжээний мөнгө хандивлагдсан тухайд.
Энэхүү кампанит ажилд нэртэй одууд, тансаг брэндүүд дэмжлэг үзүүлж ирсэн атлаа ердөө 300 сая вон (210 мянган ам.доллар) л хандивласан гэх мэдээлэл ил болсон нь олон нийтийн гайхшралыг төрүүлжээ. Энэ тоо нь Бүгд Найрамдах Солонгосын Хөдөлмөр, халамжийн яамнаас Ардчилсан намын гишүүн Ли Су-жинд ирүүлсэн мэдээлэлд үндэслэсэн аж. Харин W Korea-гийн зүгээс 2006–2024 он хүртэл нийт хандивын хэмжээ ойролцоогоор 960 сая вон гэж тодруулсан бөгөөд 300 сая вон нь зөвхөн тус сэтгүүлийн нэрийн дор шууд хийгдсэн хандивуудыг илэрхийлж байсан гэжээ. Энэ жил хандивлах төлөвтэй 150 сая вон-ыг нэмбэл нийт дүн нь 1.1 тэрбум вон буюу 20 жилийн хугацаанд ийм хэмжээтэй болсон байна — энэ нь олон хүнд хангалтгүй санагджээ.
Энэ жилийн арга хэмжээнд Солонгосын хамгийн алдартай одууд болох жүжигчин Бён У-сок, BTS, Aespa хамтлагийн гишүүд зэрэг олон алдартнууд оролцож, арга хэмжээ богино хугацаанд сошиал медиагаар тархжээ.
Олон хүн оролцогчдын дунд дэлхий нийтэд хөхний хорт хавдрын бэлгэдэл болдог ягаан тууз зүүсэн хүн бараг харагдаагүй бөгөөд арга хэмжээний уур амьсгал нь уг аяны гол зорилготой холбоогүй байсан хэмээн шүүмжилжээ.
Эх сурвалж: The Korea herald
