НЬЮ-ЙОРК, аравдугаар сарын 26 (CNN) – Хиймэл оюун ухаанд суурилсан чатботуудын өрсөлдөөн ширүүсэж байгаа энэ үед Microsoft компани хүүхдүүдэд аюулгүй, ёс суртахуунтай AI хөгжүүлэх зорилго тавьж буйгаа мэдэгдлээ.
Microsoft-ийн хиймэл оюун ухааны гүйцэтгэх захирал Мустафа Сүлейман CNN-д өгсөн ярилцлагадаа:
“Бид сэтгэл хөдлөлийн оюун ухаантай, энэрэнгүй, дэмжлэг үзүүлдэг, гэхдээ хамгийн гол нь итгэл даах AI бүтээж байна. Би хүүхдэдээ итгэж хэрэглүүлэхүйц AI хийхийг хүсэж байна. Үүний тулд AI нь тодорхой хил хязгаартай, аюулгүй байх ёстой” гэж онцоллоо.
Сүлейманын хэлснээр Microsoft нь OpenAI, Meta, Google зэрэг аваргуудтай өрсөлдөөнд орж, Copilot нэртэй AI туслахыг дараагийн томоохон тооцооллын эрин үеийн гол хэрэгсэл болгохоор зорьж байна.
Компанийн мэдээлснээр, Copilot нь одоогоор Microsoft-ийн бүх платформ даяар сарын 100 сая идэвхтэй хэрэглэгчтэй, харин өрсөлдөгч OpenAI-ийн ChatGPT нь сарын 800 сая хэрэглэгчтэй байгаа аж. Гэсэн ч Microsoft аюулгүй, итгэлтэй хэрэглээний загвараар*өргөн хүрээний хэрэглэгчдийг татна гэж итгэж байна.
“Бид хүмүүст зориулагдсан AI бүтээх ёстой — хиймэл хүн биш,” гэж Сүлейман энэ оны эхэнд блогтоо бичжээ.
Энэхүү ярилцлага нь Microsoft компанийн пүрэв гарагт танилцуулсан Copilot-ийн шинэ боломжуудын өмнө хийгдсэн бөгөөд шинэчлэлд өмнөх яриаг эргэн харах, бүлгийн яриа хийх, эрүүл мэндийн асуултад илүү нарийн хариулах, мөн “real talk” нэртэй илэн далангүй, энгийн ярианы горим зэрэг шинж чанарууд багтжээ.
Сүүлийн үед АНУ-д хэд хэдэн гэр бүл OpenAI болон Character.AI-ийг шүүхэд өгч, тэдний чатботууд хүүхдүүдэд сэтгэцийн хохирол, амиа хорлолтод хүргэсэн гэж буруутгаж байгаа билээ. Мөн Meta-ийн чатбот болон бусад AI дүрүүд насанд хүрээгүй хэрэглэгчидтэй зохисгүй, бэлгийн өнгө аястай харилцаанд орж байсан тухай мэдээллүүд гарч, олон нийтийн санаа зовнилыг төрүүлсэн.
Үүний дараа технологийн компаниуд насанд хүрээгүй хэрэглэгчдийг хамгаалах шинэ арга хэмжээнүүдийг хэрэгжүүлж эхэлсэн бөгөөд агуулгын хязгаарлалт, эцэг эхийн хяналт, мөн нас тодорхойлох хиймэл оюуны систем зэргийг нэвтрүүлжээ. Гэвч эдгээр системүүдийн үр дүн бодит амьдралд хэр найдвартай байгааг тодорхойлох боломжгүй байна.
OpenAI-ийн гүйцэтгэх захирал Сэм Альтман энэ сард хийсэн мэдэгдэлдээ, шинэ аюулгүй байдлын хамгаалалт нэвтрүүлсний дараа ChatGPT нь насанд хүрсэн хэрэглэгчдэд эротик сэдвээр ярих боломжийг олгоно гэж мэдэгдсэн.
Харин Microsoft-ийн Сүлейман “Бидний хувьд романтик, сээтэгнэлтэй, эротик агуулга нь ямар ч тохиолдолд — бүр насанд хүрэгчдэд ч — зөвшөөрөгдөхгүй. Энэ чиглэлд бид явахгүй” гэж хатуу мэдэгдэв.
Тэрээр мөн Microsoft компанид “залуу хэрэглэгчийн горим” гаргах шаардлага байхгүй гэж үзэж буйгаа хэлээд, “Хэрэв AI нь анхнаасаа ёс суртахуунтай, найдвартай, аюулгүй байвал хүүхдүүдэд зориулсан тусгай горим хэрэггүй юм” хэмээн онцолсон байна.
Эх сурвалж: CNN news.
