Боловсролын ерөнхий газрын дарга Т.Ням-Очир, Тэгш хамруулах боловсролын хэлтсийн төлөөлөл Казахстан улсын Астана хотын ерөнхий боловсролын 64, 52 дугаар сургуулийн удирдлагуудыг хүлээн авч уулзлаа.
Астана хотын ерөнхий боловсролын 64 дүгээр сургуулийн захирал Баймуратова Бану Алимжановна, 52 дугаар сургуулийн захирал Бекжанова Жаудир Бактияровна нар Казахстан улсын сурган хүмүүжүүлэх ухааны доктор, профессор Н.А. Оразахынованын “Хэлийг алхам, алхмаар нь цогц сургалт”-ын технологийг хичээл, сургалтаа зохион байгуулахдаа ашигладаг бөгөөд энэхүү өөрсдийн туршиж хэрэгжүүлсэн сайн туршлагыг Баян-Өлгий аймгийн Боловсролын газартай хамтран Дэлүүн сумын ерөнхий боловсролын нэгдүгээр сургуульд эх хэлний хичээлд хэрхэн нэвтрүүлэх талаар сургалт, семинар зохион байгуулах юм.
Үндэстний цөөнх болох казах хүүхдүүдийн эх хэлээр сурч боловсрох эрх нь зохих хууль тогтоомжийн дагуу хангагдахын зэрэгцээ казах хэл, уран зохиолын судлагдахууны багш нарын мэргэжлийг дээшлүүлэх, бусад судлагдахууны багш нарыг хос хэлний сургалтын арга зүйгээр хангах чиглэлээр Бүгд Найрамдах Казахстан улсын боловсролын байгууллагуудтай хамтран ажиллаж байна.
Уулзалтаар багш солилцоо, багш чадавхжуулах сургалтын хөтөлбөрүүд, тэгш хамруулах боловсролын талаар санал солилцлоо.
