Манай humanz.mn сайт нь унших дадлыг дэмжих, олон нийтийн мэдлэгт нэмэр болох, уншиж бичих чадварыг хөгжүүлэх зорилгоор алдартай зохиолчдын бичсэн номын онцлох агуулгуудыг хүргэдэг билээ. Энэ удаа бид зохиолч Я.Арслангийн “Эрүүл урт наслах алтан судар” номыг сонголоо. Энэхүү бүтээл нь 2023 онд уншигчдын гарт хүрсэн бөгөөд сонирхолтой олон мэдээллийг багтаажээ. Тус номонд багтсан мэдээллээс уншигч танд хүргэе. Та бүхэн “Эрүүл урт наслах алтан судар” номыг Интерном дэлгүүрээс худалдан авах боломжтой.
Ханиад, томууг юугаар эмчлэх вэ
Анагаахын эрдэмтдийн үзэл баримтлал: Ханиадны хоёр гурван зуун вирусийн халдварыг эмчлэх эмчилгээ байхгүй. Эдгээр халдварыг хүндрэхээс сэргийлэх боломж бас байхгүй.
Ханиадны эмчилгээнд дараах арга тактик хэрэглэнэ:
1. Ханиад, томууны шинж тэмдгийг хөнгөвчлөх шаардлагатай үед энгийн, хямд шинж тэмдгийн эм хэрэглэж болно.
2. Өвчтөнүүд ямар шинж тэмдгийн үед халдвар хүндэрч болох, хэдийд эмчид зайлшгүй хандвал зохихыг мэдэж байх хэрэгтэй.
Анагаахын эрдэмтэн нөхдийн баримталж буй арга тактикаас үзэхэд зөөлөн эмийг цаг алдахгүй хэрэглэ гэж байна.
Анхаар! Ханиад, томуу бол хамгийн аюултай өвчний нэг гэдгийг ДЭМБ хүлээн зөвшөөрсөн. Ханиад томуу туссан үед баримталбал зохих тактик бол:
Цаг алдахгүй эмчлэх хэрэгтэй. Эмчид үзүүлж, шинжилгээ өгч, эмийн сангаас эм авах гэж явсаар байгаад өвчнийг хүндрүүлдэг. Цаг алдахгүй байх нь хамгийн чухлаас чухал зарчим мөн. Өвчний шинж тэмдэг дөнгөж эхлэх төдийд, хэрэв эмчид хурдан үзүүлж чадахааргүй байвал гарын дор байх зөөлөн эм тан ууж эхлэх хэрэгтэй. Тэгээд эмчид үзүүлэхэд болно.
Зөөлөн эм уухыг эрхэмд үзнэ. Антибиотик мэтийн хатуу эм уухад өвчин улам хүндэрч, эмийн харшил үүсэх эрсдэл нэмэгдэж болзошгүй. Ургамлын сироп, цэр ховхлох эм, ман-4, норов-7 тан хэрэглэж байдлыг ажиглах хэрэгтэй.
Эх сурвалж: “Эрүүл урт наслах алтан судар” ном