2025-2026 оны хичээлийн жилд БНСУ-ын Төмөр замын Дуньян Их Сургуульд “ТЭТГЭЛЭГТ ХӨТӨЛБӨР”-өөр суралцах оюутнуудыг Зам, тээврийн яамны Төрийн нарийн бичгийн дарга С.Батболд өнөөдөр (2025.09.10) хүлээн авч уулзлаа.
Энэхүү тэтгэлэгт хөтөлбөр нь Зам, тээврийн яам болон БНСУ-ын Дуньян их сургууль хооронд байгуулсан санамж бичгийн хүрээнд Монгол Улсын төмөр замын салбарын хүний нөөцийг бэлдэх, хоёр улсын төмөр замын технологийг боловсронгуй болгох зорилготой юм.
Тус санамж бичгийн хүрээнд 2025-2026 оны хичээлийн жилд “Дуньян их сургууль”-ийн бакалаврын сургалтад анхны 20 оюутныг сонгон шалгаруулж, суралцуулахаар болжээ.
Зам, тээврийн яамны Төрийн нарийн бичгийн дарга С.Батболд дээрх 20 оюутныг хүлээн авч уулзах үеэрээ сурлагын өндөр амжилт хүсэхийн зэрэгцээ зам, тээврийн салбар тэр дундаа төмөр замын мэргэжлийн онцлогийг тайлбарлан, сурах орчин, хичээлийн бусад цагаар өөрийгөө хөгжүүлэх боломж зэрэг сэдвээр нээлттэй ярилцав. Уулзалтын төгсгөлд амжилттай суралцаж төгсөөд эзэмшсэн мэргэжлээрээ эх орноо хөгжүүлэхэд үнэтэй хувь нэмэр оруулахыг захиж, амжилт хүслээ.
Тэтгэлэгт хөтөлбөрийн хүрээнд сургалтын төлбөрийг дараах байдлаар хөнгөлөхөөр болжээ.
1 дүгээр дамжааны сургалтын төлбөр 7.600.000-30%=5.320.000 вон
2 дугаар дамжааны сургалтын төлбөр 7.600.000-40%=4.560.000 вон
3 дугаар дамжааны сургалтын төлбөр 7.600.000-40%=4.560.000 вон
4 дүгээр дамжааны сургалтын төлбөр 7.600.000-40%=4.560.000 вон
Үүнээс суралцах хугацаанд амжилт гаргаж, голч дүнгийн оноогоор тэргүүлсэн тохиолдолд дахин хөнгөлөлт эдлэх боломжтой аж.
