Хүмүүс ихэнхдээ мөнгөний төлөө өглөө эрт босож, ажилдаа явж, долоо хоногийн 5 өдөр өдрийн 8 цаг ажил дээрээ суудаг гэхэд буруудахгүй. Энэ нь өөрийн орлогын хүрээнд боломжтой, дуртай зүйлээ худалдаж авахын төлөө байдаг. Гэвч асар их орлоготой хэр нь санхүүгийн мэдлэггүйгээсээ болж тогтмол санхүүгийн асуудалтай тулгарах тохиолдол багагүй гардаг. Ингээд хүн бүрийн мэдэх шаардлагатай санхүүгийн сахилга батын талаар мэдээллийг танд хүргэе.
Өөрийгөө санхүүгийн эрх чөлөөнд хүрсэн гэдгээ батлахын тулд мөнгөө хамаагүй үрдэг
Санхүүгийн эрх чөлөөнд хүрсэн хэр нь мөнгөө хэрхэн захиран зарцуулахаа мэдэхгүй, өөрийгөө “баян” мэтээр харагдуулах гэсэн оролдлого нь санхүүгийн хямралд хүрэхэд нөлөөлдөг. Тиймээс ч бусдын анхааралд өртөхийн тулд өөрт ямар ч хэрэггүй зүйл худалдаж авах тохиолдол ч гарна. Гэхдээ энэ нь бусад хүмүүст тийм ч сонин санагдахгүй шүү дээ. Жишээлбэл: Үнэтэй тансаг машин нь хэсэг хугацаанд л бусдын нүдийг хужирлана. Хэрвээ та зөвхөн бусдын анхаарлыг татаж, атаархлыг нь төрүүлэх зорилготойгоор л үнэтэй худалдан авалт хийдэг бол ирээдүйд хоосрох магадлалтай гэдгийг санаарай. Таны хувьд хангалттай мөнгөтэй бол мөнгөө өсгөх хөрөнгө оруулалт хийх, үл хөдлөх хөрөнгө худалдаж авахыг эрмэлзэх нь зүйтэй. Санхүүгийн эх үүсвэр сайтай байна гэдэг нь санхүүгийн эрх чөлөө, аюулгүй байдлыг амлах ч бусдаас ялгарах онцлог биш.
Тэтгэвэрт гарах үед хамгаалалт болно
Хэдийгээр тооцоо хийх нь таны хувьд ядаргаатай ажил мэт санагдах ч энэ нь амьдралд зайлшгүй шаардлагатай чадваруудын нэг юм. Танд хэн ч юу ч өгөх ёсгүй гэдгийг та эрт ойлгох хэрэгтэй бөгөөд төр засгаас ч тэтгэвэр заавал өгөх албагүй шүү дээ. Тиймээс хөгширсөн хойноо санхүүгийн асуудалд орж зовохгүйн тулд залуу дээрээ мөнгөө зөв зүйлд зарцуулж, хөрөнгө оруулалт хийснээр таны өтөл нас санхүүгийн асуудалгүй аз жаргалтай байж чадна.
Баялаг гэдэг таны орлогын хэмжээ бус харин хэмнэлт юм
Зарим хүмүүс баялаг гэдгийг их хэмжээний орлого олж, түүнийгээ хүссэнээрээ зарцуулахыг хэлнэ гэж ойлгодог. Гэтэл ямар ч тооцоололгүй зарлага гаргах нь орлого багатай хүмүүсийн адилаар цалин буусны 7 хоногийн дараа л мөнгөгүй болох асуудалд хүргэнэ. Баяжихын тулд их хэмжээний мөнгө олж түүнийгээ үрэх биш, харин орлого зарлагаа тэнцвэртэй барьж, зардлаа хэмнэх чадварт суралцахыг хэлнэ. Харин хэмнэсэн мөнгөө богино болон урт хугацааны хөрөнгө оруулалтад зарцуулах нь зүйтэй. Үүний ачаар та өөрийн хөрөнгийг нэмэгдүүлж, илүү баяжих боломжтой.
Хэрвээ амжилтад хүрэхийг хүсэж байвал дампуурсан хүмүүсийг сайн ажиглаарай
Амжилтад хүрэхийн тулд бид ихэнхдээ амжилтад хүрсэн хүмүүсийн ярилцлагыг сонсож, мэдээлэл, намтрыг уншиж байдаг. Үүнийгээ бид амжилтад хүрэхэд туслах хүч гэж ойлгодог. Гэтэл үнэндээ үргэлж амжилтын талаар унших нь буруу хөдлөх нөхцөлийг бүрдүүлдэг. Учир нь тэд алдаа гаргаж, алдаа дээрээ суралцсанаар амжилтад хүрдэг гэдгийг санаарай. Хэрвээ та үнэ цэнтэй туршлага хуримтлуулж, өөрийн зорилгодоо хүрэхийг хүсэж байвал амжилтгүй оролдлогын талаар унших нь зүйтэй. Энэ мэдээллээс та тухайн хүнийг алдаа гаргахад нөлөөлсөн хүчин зүйлийн талаар мэдэж, ямар алдаа гаргахаас зайлсхийх хэрэгтэй тал дээр тодорхой мэдлэгтэй болно. Амжилтад хүрсэн хүмүүс ихэнхдээ замдаа тулгарсан алдааныхаа талаар бусдад бараг л ярьдаггүй бөгөөд амьдрал нь үргэлж шулуун дардан байсан мэт ойлголтыг төрүүлдэг.
Мөнгөний ханш тогтвортой биш
Бид ихэнхдээ ирээдүйгээ харахдаа зөвхөн нэг, хоёр хоногийг л илүү баримжаатай харах боломжтой байдаг бөгөөд харин мөнгийг үргэлж тогтвортой байна гэж боддог. Гэтэл үнэндээ жилийн дараа валютын ханш хэрхэн өөрчлөгдөхийг та тааварлаж чадахгүй шүү дээ. Тиймээс валютын ханш нэмэгдэх, буурах үед төдийлөн хямрах хэрэггүй бөгөөд энэ бол чөлөөт зах зээлийн дүрэм шүү дээ. Тиймээс хөрөнгө оруулалтыг алт, үл хөдлөх хөрөнгө, хувьцаа гэх мэт төрөл бүрийн зүйл дээр хийж, өөрийгөө хамгаалах хэрэгтэй. Бүх зүйлийг нэг сагсанд хийх гэдэг нь буруу сонголт шүү.
Хөнжлийнхөө хэрээр хөлөө жийх
Өмнө нь бид орлого хамаагүй зарцуулах нь мөнгөгүй болоход нөлөөлдөг гэж хэлж байсан билээ. Өөрийгөө баян мэт харагдуулах гэсэн оролдлого нь таныг тухгүй амьдралд шилжүүлэх магадлалтай. Тиймээс орлого, зарлагаа үргэлж тооцоолж байх хэрэгтэй бөгөөд бидний хэлж заншсанаар “хөнжлийнхөө хэрээр хөлөө жийх” хэрэгтэй юм. Хэт их зарлага гаргаснаар хүмүүс их хэмжээний өрөнд ордог бол, хэт их хэмнэлт хийхэд мөн л өөрийн хүссэнээр амьдарч чадахгүй байх сул талтай. Зарлага нь ерөнхийдөө таныг өрөнд оруулахгүй, мөн хэмнэлт хийх боломжоор хангаж өгөх ёстой. Энэ тохиолдолд таны амьдрал сонирхолтой, стресс багатай байх болно.
Мөнгөтэй холбоотой төгс жор гэж байхгүй
Мөнгөтэй холбоотой бүхий л зүйл хувь хүний сахилга батаас хамаарна. Тиймээс санхүүчид, хувийн өсөлтийн дасгалжуулагчид, блогерүүд болон бусад мэргэжилтнүүдийн мөнгө олох, мөнгө хадгалах, зарцуулахтай холбоотой өгч буй зөвлөгөө нь үнэндээ тэдний чадваргүй байдлыг харуулж байгаа бөгөөд хүн бүр өөрийн амьдралын хэв маяг дээр тулгуурлаж энэхүү жорыг гаргах хэрэгтэй. Зарим тохиолдолд алдартнуудын өгч буй үнэтэй зөвлөгөө нь танд сөргөөр нөлөөлөх ч магадлалтай. Мөнгөтэй холбоотой асуудал дээр бусдын бэлэн жорыг идэх бус харин өөрт тохирох цор ганц жорыг гаргах хэрэгтэй гэдгийг санаарай.
Мөнгөөр аз жаргалыг худалдаж авч болно
Мэдээж, та мөнгөөр жинхэнэ сэтгэлийг худалдаж авах боломжгүй. Энэ бол ямар ч мөнгөөр үнэлшгүй зүйл билээ. Хэдийгээр цахим сүлжээгээр амьдралын хамгийн чухал зүйл “мөнгө” биш гэдэг ч энэ бол худал зүйл гэдгийг та өөрөө ч мэдэж байгаа биз. Амьдралын чухал зүйлсийн эхний гуравт “мөнгө” ерөнхийдөө багтдаг. Ихэнх хүмүүс мөнгөөр хоол хүнс, ахуйн хэрэглээ, амттан гэх мэт богино хугацааны аз жаргалыг мэдрүүлдэг зүйлсийг авахаас гадна шинэ туршлага хуримтлуулах боломжоо бүрдүүлдэг.