Улаанбаатар хотын агаар, хөрсний бохирдлыг бууруулах, гэр хорооллыг орон сууцжуулж иргэдийн ая тухтай орчинд амьдрах нөхцөлийг бүрдүүлэх зорилтын дагуу “Улаанбаатар хотын ногоон орон сууц төсөл”-ийн хүрээнд Сонгинохайрхан дүүргийн 9 дүгээр хороонд 5.6 га газрыг чөлөөлж, 13 блок бүхий нийт 462 айлын ногоон орон сууцны хорооллыг барьж буй.
Өнөөдрийн байдлаар эхний ээлжийн 110 айлын орон сууцны барилга угсралт 97 хувийн гүйцэтгэлтэй үргэлжилж байгаа бөгөөд Улсын комисст хүлээлгэн өгөхөөр бэлтгэл ханган ажиллаж байгаа юм. Үүнтэй холбоотойгоор нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай болон холбогдох албаныхан уг байршилд ажиллалаа.
НЗДТГ, Азийн Хөгжлийн банк болон Уур амьсгалын Ногоон сантай хамтран хэрэгжүүлж буй уг төслийн эхний ээлжийн 110 айлын дөрвөн блок орон сууцанд саарал ус, сэргээгдэх эрчим хүч, хүлэмж, ногоон байгууламж зэрэг асуудлыг давхар шийдэж өгснөөрөө онцлог. Эко төлөвлөлтийн гол агуулга нь дулаан алдагдлыг бууруулах бөгөөд ашиглалтын зардлыг 20 хувь хүртэл бууруулахаас гадна усыг 25-26 хувь хүртэл хэмнэнэ. Мөн орох хаалганаасаа эхлээд нэг давхар тэр чигээрээ тусгай хэрэгцээт иргэнд ээлтэй байдлаар иж бүрэн тоноглогдсон. Өөрөөр хэлбэл өргөн хаалгатай, угаалгын өрөөнд тэргэнцэртэй иргэн бүтэн эргэх боломжтой.
Түүнчлэн барилга бүр өөр өөр байгальд ээлтэй шийдлийг нэвтрүүлсэн. Тодруулбал, С блокийн барилгын онцлог нь гаднаас тусаж буй дулааныг шилэн ханаар дамжуулан дотор хана руу шингээж, тухайн шингээсэн дулааныг нийтийн эзэмшлийн талбай буюу коридор руу дамжуулан, халуун сэнсээр үлээх маягаар халаалтыг шийдэж байгаа юм. Харин айл өрхийн дулааныг нэгдсэн байдлаар шийднэ.
Ташрамд, тус төслийн барилга угсралтын ажлын гүйцэтгэгчээр дотоодын “Хаппи бьюлдинг”, “Сити ландмарк”-ийн түншлэл болон “Содон номин констракшн”, “Цамхаг Констракшн” ХХК-ийн түншлэл шалгарсан бол гадна инженерийн сүлжээний ажлын гүйцэтгэгчээр “Сан” ХХК шалгарч төслийн ажил үргэлжилж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
