Нийгмийн даатгалын байгууллага төрийн албан хаагчдын ёс зүйн мэдлэг, ёс зүйн зарчим, үнэт зүйлсийг үйл ажиллагаандаа хэрэгжүүлэх, төрийн үйлчилгээг шударга, ил тод иргэдийн итгэлийг хүлээх төрийн үйлчилгээг үзүүлэх зорилт тавин ажиллаж байна. Нийгмийн даатгалын байгууллага нь Ёс зүйн 30 дэд хороо, 137 гишүүнтэйгээр үйл ажиллагаагаа явуулж байна.
Нийгмийн даатгалын ерөнхий газрын Ёс зүйн дэд хорооноос 2025 оны 06 дугаар сарын 04-ний өдөр 21 аймаг, 9 дүүргийн Нийгмийн даатгалын газрын Ёс зүйн дэд хорооны гишүүд, албан хаагчдад “Төрийн албан хаагчийн ёс зүйн тухай хууль, түүний хэрэглээ” сэдэвт сургалтыг зохион байгуулж, сургалтыг Нийгмийн даатгалын ерөнхий газрын Ёс зүйн дэд хорооны дарга, Бодлогын хэрэгжилт, төлөвлөлтийн газрын дарга Ц.Ганцэцэг нээлээ. Сургалтаар:
- Ёс зүйн зарчим, үнэт зүйлсийг төрийн үйлчилгээнд хэрэглэх, ач холбогдлыг таниулах;
- Ёс зүйн зөрчил, түүний үр дагаврын талаарх бодит жишээн дээр ажиллаж, шийдвэр гаргах ур чадварыг хөгжүүлэх;
- Ёс зүйн зөрчил гарахаас урьдчилан сэргийлэх арга хэмжээг авах, зөв ёс зүйтэй хандлагыг төлөвшүүлэх;
- Иргэд, даатгуулагчдад нийгмийн даатгалын үйлчилгээг шударга, ил тод, ёс зүйн зөрчил гаргахгүйгээр үзүүлэх зэрэг цогц мэдлэг, мэдээллийг албан хаагчдад олгох юм.
Салбарын ёс зүйн хорооны гишүүдийг чадавхжуулах сургалтад танхим болон цахимаар 130 албан хаагч хамрагдлаа. Цаашид 11 удаагийн сургалтыг цувралаар зохион байгуулахаар төлөвлөж байна. Сургалтаас олсон мэдлэг, ур чадвараа ёс зүйн хорооны гишүүд өөрсдийн ажлын байрандаа хэрэгжүүлэн ажиллах нь чухал юм.
