Шинэ оны босгон дээр АШУҮИС-ийн харьяа OSCE клубээс “Дулаахан Өвөл” сайн үйлсын аянг зохион байгуулж олон олон хүүхэд багачуудыг баярлууллаа. Өвлийн улирлын оргил хүйтний үед зорилтот бүлгийн 18 хүртэлх насны 43 хүүхдэд дулаан хувцас, бэлэг, хэрэгцээт амин дэм, витамин бэлэглэжээ.
- Тус аяны хүрээнд Баянзүрх дүүрэг болон Чингэлтэй дүүргийн дугаар хороодод амьдарч буй тусламж хэрэгтэй хүүхдүүдэд өвлийн дулаан хувцас гутал, ороолт малгай, витамин, ууттай бэлэг тараасан юм.
АШУҮИС-ийн “Анагаах Ухааны Сургууль”-ийн сургалтын албаны харьяа “OSCE” клуб нь анх 2009 оноос хойш одоог хүртэл 14 жилийн турш идэвхитэй үйл ажиллагаа явуулж байгаа оюутан төвт клуб аж. Тус клубээс жил бүр сайн үйлсийн аян зохион байгуулж мөн клубээрээ идэвхтэй оролцдог онцлогтой оюутан төвт сайн дурын клуб юм.
OSCE клубийн тэргүүн Д. Эрмүүн: Цахим орчин дахь нэгэн нийтлэл дээр маш олон бяцхан хүүхдүүд их хэцүү орчинд амьдарч, өдөр бүр эрх нь зөрчигдөж байгааг хараад сэтгэл их өвдсөн. “Яагаад энэ хатуу нийгмийн золиос нь хүүхдүүд байх ёстой юм” гэсэн асуулт толгойноос ердөө гарахгүй байсан. Тиймээс жилийн өмнө анх энэхүү “Дулаахан Өвөл” аянг хийх санаа төрж байсан.
Хүнд авахаас илүү өгөх нь аз жаргалтай байдаг гэдэг шүү дээ. Мэдээж зохион байгуулах явцад их аз жаргалтай байлаа. Аянийг OSCE клубийн хамт олон минь, “Сондра нүдний эмнэлэг”, “Lenus med LLC”, М.Дөлгөөн нартай хамтран амжилттай зохион байгуулсандаа их баяртай байна. Цаашдаа илүү том хүрээг хамран олон жил зохион байгуулах зорилготой байгаа. Бидний хийсэн ажлын үр дүнд олон бяцхан үрсийн баярлаж байгааг, нүд нь хэрхэн гэрэлтэж байгааг харах их сайхан байсан. Хүүхдүүдээ дагаад бидний нүүрэнд ч мишээл тодроод. Гэхдээ цаанаа л гунигтай, ямар орчинд өсөж торниж байгааг нь хараад үүнээс илүүг хийж чадахгүйдээ гэмших сэтгэл төрж байлаа.
